Pathianni khan Mizoram-ah Sample 996 enfiah leh niin heng atang hian hri kai 190 hmuhchhuah leh an ni a, Sample enfiah atanga za zela 19.07 te chuan hri kaiin Mizoram-ah COVID-19 hri kai hmuhchhuah an la pung zel a ni.
Serchhip District-ah nimin khan African Swine Fever avangin Vawk 64 zet a thi leh a, nimin khan Serchhip District-ah Vawk 54 lai suat leh a ni bawk.
Serchhip District-a COVID-19 hri kai te zingah nimin khan mi 9 te chu enkawl dam niin anmahni enkawlna hmun atanga chhuahtir an ni.
Kumin a Elementary School-a Zirlaite hnena sawrkar in a thlawna Zirlaibu a sem turte chu nimin khan Serchhip District-ah semchhuah tan a ni.
COVID-19 hri leng avanga hmalakna hrang hrang ngaihtuahin nimin khan Health Minister hovin sawrkar mi pawimawh te chu SAD Conference Hall-ah an thukhawm a. He hunah hian COVID-19 hri kai an pun belh zel avangin Dedicated COVID Hospital (DCH), SRHF-ZMC chu a khat hneh hle tih tarlan a ni.
Mizoram Rajya Sabha MP, K. Vanlalvena chuan Assam Police leh Assam mipuiten Mizoram chuha an rawn nek buaina hmun leh buaina an siam fona- Vairengte, Phainuam, Saihapui V leh Buarchep chu nimin khan a tlawh.
NHM Employees Union Mizoram (NE-UM) chuan Vawiin atanga ni thum (3) chhung a huho-a chawlh lak an tum chu an thulh rih tih an sawi.
Home Minister, Lalchamliana chuan nimin khan a Pisa-ah thuthar thehdarhtute kawmin Assam leh Mizoram ramri buai chungchangah loh theihloh thilah lo chuan inkah loh hram chu an duhdan a ni tih sawiin, “Inkah hi kan tlin (afford) in kan hre lo a, amaherawh chu a tul a nih chuan kan inkap ang,” a ti.