Assembly Budget Session-ah kum 2022-2023 Mizoram budget cheng vbc. 14,008.15 pharh a ni

Kum 2022-23 Mizoram Budget Estimate, cheng vbch. 14,008.15 chu nimin khan Finance changtu, Chief Minister Zoramthanga chuan Assembly House-ah a pharh a. Budget pumpui atangin hmasawnna hna thar thawhna tur (Capital Expenditure) chu zaa 28.57 a ni a, SEDP-ah cheng vbc. 700 dah a ni bawk.

Nimin a Assembly Budget Session chhunzawm-ah thutkhawm tan a nih veleh thildang ti lovin Finance changtu Chief Minister Zoramthanga chuan kum 2022-2023 chhunga Mizoram Budget tur hi a pharh a, Budget pharh takah hian sawrkar sum hmuh tura beisei (Receipt Estimate) leh hmanral tur beisei (Net Expenditure Estimate) chu a inzat chiah a, a pahnih hian cheng vbc. 14,008.15 ve ve a ni a. Revenue Surplus cheng vbc. 1,419.70 awm tura ngaih a ni a, hei hi Gross State Domestic Product (GSDP) atangin zaa 3.60 a ni a, Sum indaihlohna avanga sawrkar-in sum a puk tur, Gross Fiscal Deficit chu GSDP atangin zaa 3.07 ni tura chhut a ni a, Sawrkar kum thara Sawrkar leiba tlingkhawm chu cheng vbc. 12,553.08 ni tura chhut a ni a, Sawrkar leiba hi GSDP atangin zaa 31.81 a ni.

Mizoram sawrkar-in sum a thawhchhuah tura beisei chu Chhiah, State's Own Tax Revenue atangin cheng vbc. 801.30 leh Non-Tax Revenue-ah cheng vbc. 836.43, a vaiin cheng vbc. 1,637.73 a ni a, State's Own Tax Revenue atanga sum hmuh beisei hi sawrkar kum kal mek a hmuh beisei aiin zaa 11.36 in a pung a. Non-Tax Revenue-a cheng vbc. 836.43 hmuh beisei chu kum kal meka hmuh beisei 852.26 aiin cheng vbc. 15.83 in a tlem zawk thung a. State's Own Revenue tura ruahman hi sum hmuh tura ruahman zawng zawng atangin zaa 14.33 ni tura chhut a ni.

Sawrkar sum puk tur zat ruahman chhin chu cheng vbc. 2,548.34 niin Finance Commission 15-na rawtna angin Share of Taxes atanga Mizoram sawrkar-in kum 2022-23 a sum a hmuh tura ruahman cheng vbc. 3,327.82 chu Union Budget-in cheng vbc. 4,083.24-ah tihpun a remti a, a punna hi zaa 22.70 a tling a. Centrally Sponsored Scheme (CSS) hrang hrang atang sum hmuh beisei chu a vaiin cheng vbc. 2,646.64 a ni a, Scheme dang PM DevINE, NLCPR, NESID, NEC, ST Welfare Grants leh Central Road Fund atangin cheng vbc. 985.77 hmu tura ruahman a ni a, PM DevINE bikah cheng vbch. 600 hmuh beisei a ni.

Scheme for Financial Assistance to States for Capital Expenditure hnuaiah kum 50 hnua a pung awm lova rulh turin cheng vbc. 100 loan la tura ruahman mek a ni a, Externally Aided Project hnuai ah cheng vbc. 261.13 chu Grant hmanga hmuh beisei niin, chung zinga cheng vbc. 19.34 chu loan tur a ni a. NABARD hnuaiah Rural Infrastructure tih-changtlun nan cheng vbc. 170 hmuh beisei a ni. Rural Local Body Grant atan cheng vbc. 71, Urban Local Body Grant atan cheng vbc. 35 leh Health Grants-ah cheng vbc. 31 dah a ni a, thalaite All India Serice leh Central Service lama a tam thei ang ber an luh theih nan Mizoram Youth Commission hnuaiah cheng vbch. 2.60 dah a ni a, misual kut tuar emaw, an chhungte emaw hnena pek tur Mizoram Victims of Crime Compensation Fund siam tur niin cheng vbc. 1 dah a ni.

Mipui tana hmasawnna ruhrel hrang hrang dinna tur, Capital Expenditure-ah cheng vbc. 4001.64 ruahman niin hei hi Budget atangin zaa 28.57 a ni a, State Sawrkar Flagship Programme, SEDP atan cheng vbc. 700 dah niin MLA ten an bial chhunga hmasawnna hna an thawhna tur cheng vbc. 60 dah a ni a, Autonomous District Council pathumte sum hman tur turin cheng vbc. 492.03 dahin kum kal meka sum ruahman aiin zaa 9.08 in a sang zawk a. Lunglei Municipal Council bultanna atan cheng nuai 80 dah niin, Silnlung Hills Council tan cheng vbc. 6.01 leh Sialkal Range Development Council tan cheng vbc. 2.14 dah a ni bawk.
(El-a)