Chanchin thar lawrkhawm :

Korea Ambassador kawm

Parliament Budet Session neih meka tel Rajya Sabha MP K. Vanlalvena leh Ambassador of the Republic of Korea to India HE. Chang Jae-Bok te chu niminpiah khan Korean Ambassador Office chamber, Shanti Path, Chanakyapuri Delhi-ah an inkawm a, he hunah hian Mizoram Rajya Sabha MP chuan Mizo thalai tam takin Korean Film leh Culture te an ngaihsan thu leh an nun dante an entawn nasat thu sawiin, Mizo thalaite zingah Korean tawng thiam chak leh zir duh mi engemaw zat an awm thu a sawi a, Korea ram-a hnathawk duh tur pawh an tam a rin thute sawiin, a theih dan ang anga hmalak puiah a sawm a ni.

South Korean Ambassador H.E Chang Jae-Bok chuan Mizoram MP rawtna chu tih hlawhtlin ngei a tum thu hrilhin, hetiang lama hma la thin Korean Company te pawh lo bia a, hma a lak tur thu a hrilh a. Tun hma lama Mizoram a la hriat ngai loh thu leh Mizo thalaite zingah Korean tawng thiam chak an awm chu an tan thil lawmawm leh hmalak phurawm tak a ni tih a sawi bawk.

Minister in Pisa tlawh

Mizoram sawrkar-a Minister Lalruatkima chuan nimin khan Lunglei-ah a Department enkawl hrang hrangte Pisa, BDO Office, DRDA Office leh Land Revenue & Settlement Office te a tlawh a, heng Pisa hrang hrangah hian thawktu ten Minister hi lo dawngsawngin harsatna an neih leh mamawh te lo thlenin heng zingah hian thawktu indaihlohna te a tel a. Minister chuan a Department chan te harsatna leh an mamawh te a theih ang anga ngaihtuah a tum thu a sawi a ni.

Aizawl New Market enfiah

Mizoram-ah ni khat-a mihring punkhawm tam berna ni thin Aizawl New Market chu nimin khan Commerce & Industries Department Secretary Esther Lalruatkimi chuan tlawhin hri leng laka inkaihhruaina Dan siam mipuiin an zawm leh zawm loh a enfiah a, helai enkawltu ten Dan an kenkawh dan chu lawmawm a tih thu a sawi bawk.

Siaha DC in MJA te kawm

Siaha District Bawrhsap thar Lalsangliana chuan nimin khan Siaha District-a MJA Member te kawmin Siaha District-a a awm chhungin hmasawnna kaihhnawih hnathawh bakah mipui rawngbawl hna chu theihtawp a chhuah tur thu sawiin, District Administration hmalakna tur kawng hrang hrangah MJA member te chu thawhhopuiah a sawm bawk

PC Party in duhlohna thlen

PC Party chuan Mizoram sawrkarin Electric bill tihpun tuma JERC-a rawtna a siam duhlohna nimin khan an thlen tih thuchhuah siamin an tarlang a, P&E Department in JERC-a an dilna kalhmang ah Corporation anga kal ni mai awmin an inlantir nia sawiin, Department-a thawktute hlawh leh thildang mipui pawisa atanga sawrkar in a pek tur tho pawh an senso tur anga an chhut chu a dik theilo niin an sawi bawk.