Hri kai 11,664 hmu tawh

Inrinni thleng khan Serchhip District-ah COVID-19 hri kai mi 11,664 hmuhchhuah an ni tawh.

Inrinni khan Serchhip District-ah COVID-19 hri kai mi 86 hmuh belh leh an ni a, an zinga 29 te chu Serchhip-a hri kai hmuh te an ni a, AOC Veng-ah hri kai mi 25 hmuh niin Darnnam Veng-ah pathum leh New Serchhip Venglai-ah hrikai mi pakhat hmuh an ni. Heng bakah hian Thenzawl-ah hri kai mi 17 hmuh niin North Vanlaiphai-ah 13, Bungtlang-ah 8, Chhiahtlang khua ah 7, Khawlailung-ah 5, Buangpui-ah 4 leh Thentlang-ah hri kai mi 2 hmuh an ni bawk.

Inrinni khan Serchhip District-ah hri kai enkawl dam mi 257 zet awm belhin nimin khan hri kai enkawl dam chhinchhiah belh an awm lo thung a, heti hian Serchhip District-a hri kai hmuhchhuah tawh chu 11,664 niin an zinga mi 10,735 te chu enkawl dam an ni tawh a, hri kai enkawllai 900 la awmin hri kai hmuhchhuah te atanga chhutin za zela 92.03 te chu enkawl dam an ni tawh a. Nimin-a hri kai hmuhchhuah dan dinhmun erawh he thu buatsaih lai hian hriat theih a ni rihlo thung.

Nizan hmasa dar 11:45 khan R. Lalrinmawia@Marinmawia (45), Serchhip P&E Veng chu COVID-19 vangin ZMC-ah a boral ve leh a, tun thla ni 16-a hri kai hmuhchhuah niin hemi ni hian ZMC panpui nghal a ni a, amah hi natna dang nei tel niin heti hian Serchhip District-a hri kai hmuhchhuah zingah mi 29 an boral ta a, Serchhip bikah kumin a COVID-19 vanga boral hmasa ber a ni bawk.