Latest News

Lalruatkima’n MNF Candidate Vanlalzawma vote turin Serchhip bial mipuite a sawm

MNF Party General Hqrs. a Adviser, Lalruatkima chuan Serchhip bial-a hmasawnna hna thawh mek te chak zawka thawk chhunzawm zela, hmalakna tur hmachhawp tam tak awmte hlen chhuak turin MNF Candidate, Vanlalzawma Vote theuh turin Serchhip Bial mipuite a sawm.

Nimin-a Serchhip Press Club-a thuthar thehdarhtute a kawmna hunah MNF General Hqrs. Adviser, Lalruatkima chuan Serchhip bial mipuite chuan Lal Thanhawla chu MLA atan vawi 9 zet lo thlangtling tawhin, Chief Minister term 5 zet a lo chelh tawh thu leh, bial mipuite pawhin hmasawnna nasa tak an neih theih phah tih sawi a. Hei vang hian kan hma lawka inthlan lo thleng mai turah Serchhip bial tan tun dinhmunah Opposition MLA ai chuan Ruling MLA neih a tha zawk tih mipuiten an hriat nawn a duh thu a sawi a. Opposition MLA hian MLA Fund leh tih theih neuh neuhte chu nei ve bawk mahse, sawrkar chakna nen kawng engkima bial hmasawnna tura hma la thei tur Ruling MLA neih chu a tha zawk hle tih an hriat nawn a duh tih sawiin, “Opposition MLA neih ai chuan Ruling MLA kan mamawh a ni tih hriain, kan hun tha hi i bawhpelh lo ang u,” a ti.

Mipui ten hmasawnna chi hrang hrang kan mamawh - Kawngtha, nitin mamawh - buhfai, Gas, Eng, Tui, zirna tha, hriselna leh a dangte te awlsam zawkin sawrkar tha chuan min chhawp-chhuah sak thin tih sawiin, “Zoramthanga kaihhruai MNF Ministry pawhin Covid-19 hripui leng karah pawh hian kan mamawh tlangpui min phuhruk thei zel hi kan vannei takzet a ni,” a ti a. “Kan bial mamawh hrang hrangte tunge min ngaihtuah sak theitu ni ang? tih ngaihtuah chungin Vote i thlak theuh ang u,” a ti.

He hunah hian Lalruatkima chuan an Party Candidate chu a felin a tha bik an ti ngawt lo tih sawiin, “Tun dinhmun, Pu Zoramthanga kaih-hruai sawrkar in hmasawnna chak taka a kalpui mekna luipui-a luang lut ve thei tur Serchhip bial hian MLA kan neih a tul kan ti a, Serchhip bial-a hmasawnna hna thawh mek te chak zawka thawk chhunzawm zela, hmalakna tur hma-chhawp tam tak awmte hlenchhuak turin MNF Candidate Pu Vanlalzawma hi a remchang in a tha ber a ni, tiin mipuite khawngaih vote kan rawn dil a ni e,” a ti bawk.

Comments

Chhiar Hlawhte