Latest News

Lungsen khua-a Vawk 108 thih chhan African Swine Fever (ASF) a nih ngei rin a ni

Lunglei District chhung Lungsen khua-a Vawk natna hri la hriatchian loh avanga Vawk thi chu nimin thleng khan 108 an tling tawh a, AH&Vety Minister Dr. K. Beichhua chuan heng Vawk thi te nat dan en hian African Swine Fever (ASF) ni ngeia hriat a nih thu a sawi.

AH&Vety Minister, Dr. K. Beichhua hian nimin khan a chenna In-ah thuthar thehdarhtute kawmin nimin chawhnu dar 1:00 thleng khan Lungsen-ah hian Vawk 108 a thi tawh tih sawiin, “Heng Vawk thite hi an nat dan en hian ASF a nih ngeiin kan hria a. Mahse, Confirmatory Test tak hi chu National Institute of High Security Animal Diseases (NIHSAD) chauhin an puan theih avangin, keini chuan a ni ngei e tiin kan puang thei lo a ni,” a ti.

Lungsen-a Vawk natna hri leng mek chu khawi atanga lut chiah nge sawi fak a harsat thu sawiin AH&Vety Minister chuan, “Bangladesh lam atangin a ni mai lo maw tih rinna kan nei a. Chubakah, Mizoram pawnlam atanga sarep lakluh vang a ni thei tho bawk,” a ti a, Vawk natna hri hi a luh dan an la hriatchian mai loh thu leh hemi chungchang ah hian nimin khan Disease Investigation Team, Dr. M. Zohmingthangi Dy. Director (Disease Investigation & Epidemiology) hovin Lungsen lamah an intirh tawh thu a sawi a. A hmuna hri len dante zirchiangin hri darh zel loh nan ruahmanna te an siampui dawn bakah phai lama thawn tur Tissue leh Blood Sample te an la nghal dawn tih a sawi.

AH&Vety Minister chuan Lungsen khua a Vawk hri leng mek chu tunhma lama leng tawh thin, Classical Swine Fever (CSF) leh PRRS a ni lo tih Laboratory Test chi hnih, ELISA leh PCR hmanga finfiah a ni tawh tih a sawi a. ASF anih theihna a sang hle tih sawiin, he natna hri leng mek hi la finfiah ni lo mah se, ASF a nih theih tho avangin fimkhur thu hla ah ASF Prevention and Containment National Action Plan anga hma lak tan nghal a nih thu a sawi bawk.

Zawhna chhangin AH&Vety Minister chuan, mihring tan ASF hri kai sa pawh ei mah ila hlauhawm pha lo mah se, taksa atanga chhuak leh hi Vawk tan a hlauhawm thu tih sawiin, mihring in Vawk hri leng hi a putdarh theih thu leh natna lo awmna hmun atanga lirthei lo kal ringawt te pawhin a thehdarh theih thu a sawi a. Vawk vultute tana invena tha ber chu Vawk hri a len tawhna hmun ami Vawk te chu talh vek a, phum vek a that ber leh a him ber thu sawiin, “Chu chu kan ti thei kher lo mai thei a. Pawnlam-a Sa talh tawh lo a, Sa ei tum lo ila. Intlawhpawh loh kha a him ber a. A lenna hmun atanga kan kala, kan taksa kan a thehdarh theih a ni,” a ti bawk.

Vawk hri leng avanga Vawk vulhlai chanta te tan sawrkar-ah zangnadawmna chungchang zawhna pawh chhangin AH&Vety Minister chuan, “Hemi chungchang hi kan hotute nen kan sawi a la ngai dawn a. Hma lam hun hi sawi theih a ni lo a. Rampum ang hian hri hian min khawih lo ang tih pawh tuman kan hre thei lo a. Tuna hmalakna hian kan control mai thei a, eng ang pawhin hma la ila a rampumah hian a darh lovang tih pawh kan sawi thei lo. Zangnadawmna chungchang hi chu kan hmalam thil lo thleng tur hian a hril ang a. Ngunthluk taka kan hotute nena inrawn in sawiho a la tul a ni,” a ti bawk.

Lungsen khuaa Vawk hi March 21, 2021 atang khan an thi tan a. March 3, 2021 khan Lunglei Chief Veterinary Officer (CVO) in report dawngin, a tuk ah CVO leh Vety Officer ten Lungsen khua an thleng nghal a. Vawk thi dinhmun te a hmunah enfiah a nih bakah Blood Sample te la in Rapid Antigen Test hmangin PRRS, CSF leh ASF test an nei nghal a, Vawk thi hi 120 chuang nia sawi a awm bawk a ni.

Comments

Chhiar Hlawhte