Latest News

Ni khat-ah COVID-19 hri kai 36 zet hmuh an ni

Niminpiah khan Mizoram-ah Sample 1388 enfiah niin hri kai mi 36 zet hmuhchhuah leh an ni a, nikum Nov. 23-a hri kai mi 50 hmuhchhuah hnua nikhat-a hri kai hmuhchhuah an tam ber tum a ni.

Niminpiah khan ZMC Laboratory-ah Sample 56 enfiah niin hri kai pakhat hmuhchhuah a ni a, hri kai hmuhchhuah hi tunhnaia Mizoram pawn atanga rawn haw, Thlawhna-a a chuanpui in hri a kai avanga inkhunghrang lai a ni. District hrang hranga TrueNat Laboratory-ah niminpiah khan Sample 5 enfiah niin hri kai mi 2 hmuh an ni a, Lunglei ami ve ve niin tunhnaia Pune atanga rawn haw, Thlawhna-a an chuanpui in hri a kai avanga inkhunghrang lai an ni bawk.

Niminpiah khan Rapid Antigen Test hmangin Sample 1327 enfiah niin hri kai mi 33 zet hmuhchhuah an ni a, Lengpui Airport Screening Point-ah Mizoram-a rawn lut tur enfiah atangin hri kai mi pali hmuh an ni a, Aizawl khawchhunga hmun hrang hrangah hri kai mi 12 zet hmuh niin an zingah hian chhungkaw pakhat-a mi 6 telin hri kaina hriatloh an ni bawk. Niminpiah vek khan Champhai-ah chhungkaw pakhat-a mi 4 te te chuan hri kaiin hri kaina hriatloh an ni a, Kolasib District-ah Mizoram Police mi leh sa, Assam inthlanpui neih meka Nagaon, Assam-a Duty-a kal rawn haw mi 12 te chuan hri an kai tih hmuchhuah niin Serchhip District-ah hri kai pakhat hmuh a ni bawk.

Nimin khan Mizoram-ah hri kai 3 enkawl dam awmin nimin tlai dar 5:00 thlenga Mizoram-a hri kai hmuhchhuah chu 4558 niin an zinga 4457 te chu enkawl dam an ni tawh a, hri kai atanga za zela 97.78 te chu enkawl dam niin tunah hian hri kai enkawllai 90 an awm mek a, hri kai zingah nunna chan mi 11 an awm tawh bawk a ni.

Mizoram-a COVID-19 hri kai enkawllai 90 zinga 60 te chu Aizawl District-a enkawl an ni a, Kolasib District-ah mi 18 enkawl mek niin Champhai District-ah mi 6 enkawl an ni a, Lunglei leh Hnahthial District-ah hri kai 2 ve ve enkawl niin Serchhip leh Mamit District-ah hri kai pakhat ve ve enkawl an ni bawk.

Comments

Chhiar Hlawhte