Latest News

COVID-19 hri danna la thei chin zawng ten hri danna la vek turin Serchhip CMO in a sawm

Image
Serchhip District Chief Medical Officer Dr. Laldawngliana Sailo chuan COVID-19 chu theihtawp chhuaha kan do chung pawha kan do hnehloh a ni tih sawiin, chumi dona hmanraw pawimawh tak chu hri danna laka ni tih a sawi a, hri danna la thei chin te chu la vek turin a sawm bawk.

Mizoram siamtha tura rahbi hmasa ber chu Serchhip Bial-a bye-election hi a ni - ZPM Research Wing

ZPM Research Wing chuan Serchhip Bial chauh ni lo, Mizoram siamtha tura rahbi hmasa ber chu Serchhip Bial-a Assembly bye-election neih tur a ni tih sawiin, Serchhip Bial mipui remtihna ni lova paih tak MLA thlang nawn leh turin Serchhip Bial mipuite an ngen tih an sawi.

ZPM Research Wing hian nimin khan Serchhip Press Club-ah an Chairman, Prof. H. Lalramnghinglova hovin Serchhip-a thuthar thehdarhtute kawmin he hunah hian an Secretary, Dr. KC. Lalmalsawmzauva chuan Mizoram-a kan sawrkar hrawn tawh te ram kaihhruai danah Mizo thalaite an beidawng em em nia sawiin, neutral pawh an mangang em em tih a sawi a. Zoram hmun hrang hrangah MNF leh Congress Party atangin an Party-a beidawng mi tam tak inlamlet mekin chung mite beiseina neihchhun chu ZPM chauh a nih thu an sawi. Kum 35 chhung zet Party bil sawrkar kan nei tawh nia sawiin, chumi atanga kan chhuah theihna atan tun tumah hian Lalduhoma chu thlantlin a ngai nia an hriat thu sawiin, “Tun dinhmunah chuan ZPM leh Lalduhoma lo chu kan ram dinchhuahna kawng a awm lovah kan ngai,” a ti.

“Serchhip hi Chief Minister Bial hlun ber hi chung siin mipui tam ber te hian hma in sawn pui meuh em? Nge Party mi tlemte chauhin an hausak pui?” tia zawhna siamin ZPM Research Wing hruaitute chuan, Party CM ni lo, mipui CM kan neih ngei theih nan Serchhip Bial chu a pawimawh thu leh Mizoram hmahruaitu ni tura an duhsak thu an sawi a. 'Ruling nge nge' tia sawi thin chungchangah, tuna sawrkar kal mekah Ruling Bial nih in awmzia a neilo nia an hriat thu zawhna chhanga sawiin, sawrkar kal meka bye-election lo neih tawhna, Aizawl West-I Bial chu nitin zantin-a an kaltlangna ni mah se tun sawrkar kal mekah danglamna a awm an hriatloh thu an sawi bawk.

ZPM Research Wing chuan zirchianna an neih atangin ZPM-a an tel hmaa Lalduhoma'n a lo sawi tawh thin, 'DAH Policy' chu a tih theih ngei tih an finfiah thu pawh sawiin, ZPM an sawrkar a nih chuan Mizoram mipui zaa 60 vel, kuthnathawktu ten sawrkar budget-ah chanvo an nei ve tawh dawn tih an sawi a. Mizoram Budget hnuhnung berah Agriculture & Allied bakah Rural Development atan hnathawh a tur pawisa dah a ni lo chu pawi an tih thu an sawi.

Serchhip Zawlpui zau-a leilet neitute harsatna pakhat, mumal leh awmze nei zawka thlai thar hralhna pawh ngaihtuah pui an ngai hle tih an hriat thu sawiin, “Pu Lalduhoma a tlin a, ZPM a sawrkar chuan Zawlpui Zau-a loneitute nen tangruala ruahmanna awmze nei zawk kan siam-chhuah theih ngei kan beisei,” an ti a. Tun tum bye-election ah an Candidate a tlin loh a, kum 2023 General Election-ah ZPM a sawrkar loh hlauh chuan Mizoram chhanchhuaktu tur Movement dang piang leh turin mipuiin chakna an nei tawh kher lovang tih sawiin, “Ngun taka ngaihtuahna hmang chunga Vote thlak turin kan sawm che u a ni,” an ti.

Serchhip District chu ziak leh chhiar thiam tamna a nih thu pawh sawiin, “Lehkha thiam tamna District hian in chhia leh tha hriatna in hralh kan ring lova, midang te tana entawn tur in chhawp-chhuah ngam kan ring tlat. Mizoram khawvel-a thil thleng zen zen lo, bye-election ah hian Opposition MLA, inremtihna tel lova an paihsak ngei mai che u hi thlang nawn leh ngei turin kan ngen tak meuh meuh che u a ni,” an ti bawk.

ZPM Research Wing hruaitute chuan an Member te chu University-a zirtirtu te, Central sawrkar lam mi leh State sawrkar atanga Officer pension te bakah Entrepreneur lama mithiam te an ni tih sawiin, thil kal tawh te thlirin zirchianna te an neih thu leh Research base-a kal an nih thu an sawi a. Kal-phung thar an sawi tam ber chu ZPM sawrkar huna kalpui tur a nih thu an sawi bawk.

Comments

Chhiar Hlawhte