MPC Candidate in thuthar thehdarhtute kawmin hmalak a tumna hrang hrangte a sawi

Serchhip bial Assembly bye-election neih tura MPC Candidate, Vanlalruata chuan nimin khan Serchhip-ah thuthar thehdarhtute kawmin MLA nih chu a chak thu leh a duh thu sawiin, MLA atan thlantlin a nih hnua hmalak a tumna thenkhat a sawi.

Serchhip Press Club-a thuthar thehdarhtute a kawmna hunah hian MPC Candidate, Vanlalruata chuan tun-a India ram kan buaina chu thlai thar leh ranvulh hralhna ah a nih thu sawiin, hei hi thlai chingtute leh ranvulhtute chuan an tuar reng tih a sawi a. Hei vang hian sawrkar laipui chuan Agricultural Produce and Livestock Marketing (APLM) Act chu siamin hemi a belh ngai te belh-a hmang ve turin State te pawh tih an nih thu a sawi a. Mizoram-ah pawh kum 6 vel kalta atang khan hemi chungchangah hian sawrkar chu nawr a ni tawh chungin tun thlengin tih hlawhtlin ala nih loh thu leh nikum hmasa khan Draft siam zo tawhin tun thlengin Assembly-ah pharh ala nih loh thu a sawi a ni. He Dan hi kan hmang a nih chuan a kalpuina tura senso tul te pawh sawrkar laipui in a tum theih thu sawiin, sawrkar in ala pass lo mai bakah MLA te pawhin an la nawr loh chu MLA atana thlantlin a nih chuan a tul anga an nawr zui tur thu a sawi bawk.

Hei bakah hian Vanlalruata chuan MLA atan thlantlin a nih chuan Human Rights Commission kan neih theihna turin hmalak a nih tur thu pawh a sawi a. Human Rights bawhchhiatna hi nasa tak a awm thu leh Mizoram pawh a ziaawm pawl kan ni chungin kan tuar nasa tho tih a sawi a. Kum 20 vel kalta ah khan sawrkar laipui chuan Human Rights Commission nei turin State tin alo tih tawh thu leh Mizoram-ah chuan tun thlengin hmalakna ala awm loh thu a sawi bawk.

MPC Candidate, Vanlalruata chuan Labour Court kan neih theihna tura hmalak pawh MLA atana thlantlin a nih chuan a ngaih pawimawh tur thu sawiin, hlawhfa tam tak te chu a ruaitu ten chhan mumal awm lova an ban mai thin thu leh hlawhfa ruaitu tam tak te pawh an hlawhfa ten chhan mumal awm lova an bansan thut thut fo thin thu sawiin, hemi chungchanga a tul anga hma la thei tur Labour Court kan la neih loh thu leh India rama a neilo State tlemte zing ami kan la nih thu a sawi a. Hei vang hian MLA atana thlantlin a nih chuan Labour Court kan neih theihna tura hmalak a tum thu a sawi bawk.

Vanlalruata chuan MPC Party atanga a din chhan zawhna chhangin, PC Party in Election Commission-a Registration an buaipui chu an la tihfel loh thu leh PC Party leh PRISM-a Nomination File an tum chu a remloh avangin Recognised Party awmsa, MPC hminga he inthlan hi chuh ta an nih thu a sawi a. MPC leh PRISM te chu marger an nih avangin thlantlin pawh lo ni se harsatna a awmloh tur thu a sawi bawk.