A hma ami aia hlauhawm zawkah ngai

Health Minister Dr. R. Lalthangliana chuan tuna Covid-19 hri leng rawn thawk leh meka hi mithiam ten a hma ami aia hlauhawm zawkah an ngai tih sawiin, a veitu tam tak te pawh ICU-ah awm rei hman lovin an thi deuh nual tawh nia a lan thu a sawi.

Nimin-a Saitual khua-a sawrkar hmalakna thenkhat a tlawhna ah Health Minister, Dr. R. Lalthangliana chuan tunkar chho a COVID-19 hrileng rawn pung thar leh thut (Covid-19 second wave) avanga India ram State 18 chuang an buai takzet tawh thu sawiin, Prime Minister pawhin State hrang hrangte chu COVID-19 thawhkhatna ai khan tun, a thawhhnihna rawn leng lehah hian nasa zawk fe a fimkhur tura a chah thu leh Vaccine pawh tun aia chak zawka pekchhuah tum mek a nih thu a sawi a. Tuna COVID-19 hrileng rawn thawk leh mek hi mithiam ten a hma mi aia hlauhawm zawkah ngaiin, a veitu tam tak te pawh ICU-ah awm rei hman lovin an thi deuh nual tawh nia sawiin, “Insawi-thaihna lam pawh ni lovin he hrileng lakah hian kan fimkhur loh chuan kum khat chhunga fimkhurna kawnga kan insumtheihna leh kan thawhrimna te kha zankhat thil thu ah engmahlo ah a chang thei a ni,” a ti.

Health Minister chuan mipuite him zawk nan tun aia inkhuah-khirhna khauh zawk te pawh siam a la tul dawn tih sawiin, Inkhawm leh mipui vantlang puipuna kawnga kan zalenna hman mek te hi kan lo him zawkna tur ngaihtuahin la khap leh te pawh a tul dawnin a lang tih a sawi a. Hemi chungchang hi Kohhran Hruaitute leh Tlawmngai Pawl hrang hrang te nen pawh tunhnaiah sawiho a ni tawh tih sawiin, “Mipui te pawhin kan thuawih avanga State dang te aia kan him zawkna te kha hre reng ila. Sawrkar in SOP leh mipuite zawm tur thil a rawn siam apiang te thuawih taka zawm theuh leh turin kan insawm a ni,” a ti.

Health Minister hian District thar tihchangtlunna atan sawrkar hmalakna kal mek zela Saitual District Hospital tihchangtlun dan tur enin, Chief Medical Officer's Office sakna tur hmun te, Govt Saitual College-a building Block sak thar te, Saitual Market sak mek te leh KVI hmuhma thar tur te a tlawh a, Siatual-a KVI hmunhma hi DC Office sakna atan hman a nih dawn avangin KVI awmna hi sawn a ni.