Latest News

Pu Zawma vote turin ngen

MNF Vice President, Lalthlengliana chuan Serchhip bial mipuite chu MNF Official Candidate, Vanlalzawma thlangtling turin a ngen.

MNF Vice President, Lalthlengliana hian nimin khan Serchhip Press Club-ah Serchhip-a thuthar thehdarhtute kawmin Serchhip bial Bye-Election chu neih a nih dawn tak thu leh Candidate pawh mi 6 an awm dawn tak thu a sawi a. Mipuiten an tana tha ber tur an ngaihtuah thiam theih nan MNF Party chuan uluk taka an ngaihtuah hnuah an Party Vice President, Vanlalzawma chu Serchhip bial tana tha ber tura ngaiin an rawn dah ta tih a sawi a, heng Candidate paruk te hi party tinin mi tha tak leh fel taka an ngaih leh an dah te an nih thu pawh sawiin, “Mi fel tak pawh hi an awmna in a zir miau loh si chuan an felna hman theih lohin a awm thin. Hemi avang hian mipuiten kan ngaihtuahna kan hman uluk a ngai takzet,” a ti.

Serchhip bial-ah tihtur tam tak a awm tih an hriat thu pawh sawiin, “Chief Minister bial ni chunga heti khawpa in hnufum hi na kan tihpui tawh che u a ni. Pu Zawma hi in lo thlangtling a nih chuan MNF General Hqrs. chuan a hmalakna tinrengah kan tawiawm tlat dawn a. Chuvangin ram laili-a awm leh lehkhathiam tamna Serchhip bial mipuite hian khawngaih takin MNF Official Candidate hi lo thlangtling hram turin ka ngen che u a ni,” a ti bawk.

MNF Vice President chuan Dan phuah-chawp hmangin India ram khawi State mahin MLA ban theihna an nei lo tih pawh sawiin, Parliament pawhin MP ban theihna an nei heklo tih a sawi a, “Amah (Lalduhoma) pawh tela Dan siam ngei a bawhchhiat luih tlat avangin, chu dan hmang ngei chuan ban a ni. Tunhnuah chuan mipui bum zawngin thu sawi tawh lo se kan duh takzet a ni. Amah ngei pawhin Independent-a ding leh danglam bik anga insawiin, Val Upa Council hmaah thutiam la eng ang mah sela, Independent MLA a nihna a bo chuang lo. Hei hi Serchhip bial mipuiten i chhinchhiah tlat ang u,” a ti bawk.

Comments

Chhiar Hlawhte