Chanchin thar thenkhat :

Minister hovin sawiho

Cooperation Minister, C.Lalrinsanga chuan nimin khan a Pisa-ah tlangmi, ramngaw thar-chhuaha innghat kuthnathawktute tana buatsaih, Prime Minister Van Dhan Yojana (PMVDY) thawhkhatna Mizoram-a kalpui dan te thlirin Cooperation Department hotute nen meeting an nei a. Van Dhan Scheme hnuaiah hian Self Help Group te thawkho in Van Dhan Vikas Kendra (VDVK) engemawzat din a ni a. VDVK pakhat zelah hian Self Help Group 15 zel awm tura beisei an ni. A thawhkhatna (Phase-I)-ah Mizo-ram chhungah VDVK 44 din a ni tawh a, a thawh hnihna (Phase II)-ah VDVK 115 din a ni bawk. Van Dhan Mission tia hriat hlawh sawrkar laipui scheme hi Mizoram-ah chuan Cooperation Department chu Nodal Department a ni a. Tribal Cooperative Marketing Development Federation of India (TRIFED) nena thawhhona thuthlung MoU ziah a nih hnuah Mizoram-a kalpui tan a nih theih nan July ni 14, 2020 khan Cooperation Minister hian a lo hawng tawh a ni.

NSS chawimawina hlan

Association for Voluntary Blood Donation (AVBD) Gen. Hqrs-in nikum (2020)-a Covid-19 léng leh inkhàrkhip vuakveta thisen Unit 2,079 petu National Service Scheme (NSS), Mizoram hnena chawimawina an pek chu nimin khan Health Minister, Dr. R. Lalthangliana chuan a Pisa-ah a hlan a, hemi puala inkhawm tawi ah Health Minister chuan Covid-19 léng leh inkhârkhip vanga ram in hun khirh tak a tawh laia NSS-te inpekna chu chhuanawm a tih thu a sawi.

Nitin vaccine pe turin ti

Sawrkar Laipui atanga hriattirna an dawn angin Mizoram Sawkar-a Health Special Secretary chuan nimin khan thupek tichhuakin rang taka mipui mimirin COVID-19 vaccine an lak theihna turin Vaccination Programme-a thawktu te zawng zawng chu sawrkar leh Private Covid Vaccination Centre-ah Pathianni tih loh, nitin April, 2021 chhunga vaccine pe turin a hriattir.