Latest News

Vantawng Group YMA Conference neih a ni

Hmasawnna turin zirna uar a tul - Lalruatkima

Serchhip Sub-Hqrs. YMA hnuaia Group YMA pakhat, Vantawng Group YMA Conference vawi 24-na chu Central YMA General Secretary hlui leh I&PR Minister, Lalruatkima chuan hmanpuiin khawvel hmasawnna man pha turin zirna uar a tul thu a sawi.

Ni hnih chhung awh Vantawng Group YMA Conference Vawi 24-na Thenzawl Vengthlang Branch YMA in Victory English School Building-a an thlen hi nimin khan Central YMA General Secretary hlui, Lalruatkima hian hmanpuiin YMA chu tanpui ngaite tanpuitu, mi tumah thliar leh thlei bik nei lo, midang tana thawk, kan hnam khaidingtu, Kohhran leh party engmah thliar lo, Mizo hnam darthlalang, Mizo hnam humhimtu, hnamdang ten an awh em em kan hnam lungphum leh innghahna a ni, a ti a, YMA nula leh tlangval te chu an mawhphurhna kawng hrang hranga hlen turin a sawm bawk. Lalruatkima chuan, Zirna uar a tul thu sawiin, khawvel hmasawnna man pha turin zirna uar a tul thu a sawi a, kan Hnam a dam zel theih nan zirna hmanga tanlak a tul thu a sawi bawk.

Lalruatkima chuan, Mizo hnam dingchhuak turin tam a ngai tih pawh sawiin, fa nei tam tura tanlak a tul thu a sawi a, tun ang zela fa kan neih tlem chuan he hnam hi a dam khawchhuak zo dawn lo nia sawiin, tun atanga kum 50 a lo ral leh chuan Mizote chu Hnam tlem te, Hnam ral kan nih a hlauhawm tih a sawi a, Mizo nula te chu Hnamdang fa erawh min hrinsak lo turin a chah bawk.

Vantawng Group YMA Conference-ah hian niminpiah khan Palai ten rorelna neiin YMA Kumpuan, Zirna uar chungchangah chak taka hmalak relin, ramngaw leh nungcha humhalh kawngah nasa zawka hmalak an rel bakah, Faina leh thianghlimna kawngah an hmalakna chhunzawm zel an rel a. Vantawng Khawhthla enna chei that anih theih nan hmalak te, Thenzawl-a PHE leh Power and Electricity Department chu SDO thuthmun a nih theih nana hmalak te, Thenzawl College din tura hmalakna kal mek chhunzawm zel leh Vantawng Group YMA hnuaia awm khaw 2 - Lunglei District a awm thin, tuna Serchhip District a awm ta Zote South leh Kanghmun South khua a Sawrkar Department awm, Serchhip District hnuaia la awm lo te an awm thuai theih nan hmalak nise tih te pawh an rel bawk.

Vantawng Group YMA hnuaiah hian YMA Branch 13 - Thenzawl khawchhunga YMA Branch 9 bakah Zote South, Kanghmun South, Neihloh leh Buangpui Branch YMA te an awm a, Serchhip Sub-Hqrs. YMA hruaitute kaihhruaina hnuaiah kum 2021-2022 chhunga an hruaitu tur thlanna an nei nghal bawk a ni.

Comments

Chhiar Hlawhte