Latest News

Chanchin thar thenkhat :

Thawhhona tur hawng

Social Welfare Minister, Dr. K. Beichhua chuan nimin khan Aizawl-a a Office-ah HIV/AIDS dona kawnga hmalakna thar, Index Testing and 90-909-90 atana Mizoram sawrkar leh pawl dang te thawhhona chu a taka kalpui a nih theih nan a hawng a, he hmalakna thar atan hian Mizoram Social Defence & Rehabilitation Board, Social Welfare & Tribal Affairs (State Level Coordinating Agency, MoSJE, Govt. of India) leh Project Sunshine, UW-ITECH (University of Washington - International Training and Education Centre for Health) Aizawl, Mizoram te an thawkho dawn a ni. He thawhhona hnuaiah hian ITECH Team hian an thawhpui Mizoram State AIDS Control Society leh SHALOM lama thawktute nen IRCA hmunah kalin a thlawnin kawng hrang hrang thlanchhuah ah te hma an la dawn a ni.


Minister in hmanpui

Aizawl City Bus Owners’ Association (AC-BOA) chuan nimin khan Aizawl-a Synod Conference Centre-ah General Assembly vawi 47-na hmangin Transport Minister, TJ. Lalnuntluanga chuan khuallian niin a hmanpui a, Aizawl Smart City Project kalpui mekah Urbanization Scheme hnuaia peng pawimawh tak, Urban Transport chungchanga hmalakna Aizawl-in hmel thar a hmuh theih nan finchhuah thin tura sawmin, AC-BOA ten Special Road Permit lak danah harsatna an tawk thin tih a hriatpui thu a sawi a, hemi chungchangah hian Officer ruat bik te neiin online kaltlanga awlsam zawka tihfel dan ngaihtuah mek a nih thu a sawi bawk.


Supply Minister in hawng

Kolasib bialtu MLA leh Supply Minister, K. Lalrinliana chuan nimin khan Govt. Kolasib College Main building chunga MLA Fund, cheng nuai 10 hmanga Main Hall sak pum chu a hawng a, Minister chuan zirlaite chu hmathlir thui tak nei a, an nih tum leh an zirchhuah tum te ruahman fel-a hlawhtlin tuma bei tlat turin a chah bawk.


BJP ten CM an ngen

BJP Mizoram Pradesh Thalaite chuan Chief Minister, Zoramthanga chu a duhthusam apiang mipuite hrilh ngawt tawhlo turin an ngen tih thu-chhuah siamin an tarlang a. SEDP kaltlanga mipui hnena an inzawrh a, an tlin chhan an intiamna Rs. 3,00,000/- sem tura an phut thu pawh sawiin, “An sem thei lo a nih erawh chuan Mizo mipui rethei tak tak te hi beiseina min siam sak tawh lovin, tihtheihloh tur engmah mipui riltam te min tiam tawh lo turin kan ngen a ni,” an ti bawk.


Hri danna pe zel dawn

Ramchhunga COVID-19 Vaccine pek kalpui mekah Vawiin atang hian kum 45 chin chunglam te hnenah Vaccine pek hna thawh tan a ni dawn a, January 1, 1977 hma lama piang te hnenah hri danna hi pek a ni ang. Hemi hma-lam hian kum 60 chin chunglam leh kum 45-59, natna benvawn nei bik te hnenah hri danna hi pek an lo ni tawh a ni. Kumin Jan. 16-a CO-VID-19 vaccine pek hnuah India ramah mi vbc. 6.30 chuang hri danna pek an ni tawh a ni.

Comments

Chhiar Hlawhte