Chanchin thar thenkhat :

Mitin tanlak a ngai tih sawi

Indian Medical Association (IMA), Mizo-ram State President, Dr. Rosangluaia chuan India ram-a hluar thar mek Covid-19 thawh hnihna (second wave) chu Mizoram-ah a thlen ve loh nan mi tinin tan kan lak a ngai tih sawiin, “Tunlai hian Mizoram-ah pawh Covid-19 vei thar hmuh-chhuah hi an pung chho leh ta a, hri hi darh huk thei a nih avangin engtik lai pawha kan inven fimkhur a pawimawh,” a ti. COVID-19 natna hrik chu a thawk chak lo hret hret nia sawi chung-changah Dr. Rosangluaia chuan, “Natna hri leng reng reng hi a rei chuan a chakna hi a hloh ve tial tial thin a. Mahse, Covid-19 erawh hi chu a dan a dang a, a changin a reh deuh a, a changin a darh leh hluai a, a insiam danglam thei nia ngaih a ni bawk a. Eng ang takin nge a lo lan dawn kan hriat theih loh avangin kan fimkhur hle a ngai a ni,” a ti bawk.

Computer zirna tan leh ta

Central YMA hnuaia a thlawna Computer zirna Batch 23-na chu Inrinni chawhnu khan Central YMA Hall-ah hawn a ni. Tun tuma Computer zir tur hian mi 60 thlan an ni a, an ni hian DCA Ist Sem. an zir dawn a ni. Central YMA hnuaia a thlawna Computer zirnaah hian zirlai mi 868-in an pass chhuak tawh a, he Institution hi Higher & Techical Education hnuaia inziaklut niin, zirlai naupang sum lama harsatna neite tan tangkai taka hman mek zel a ni.

African Swine Fever ringhlel

Tunlai hian Lunglei District-a Lungsen khua ah Vawk natna hri leng mekin Vawk 70 chuang an thi tawh a, Lungsen-a Vawk hri leng mek hi tun dinhmunah engnge a nih chiah hriatchian a la ni lova, chi hrang hranga endik hnu-ah an hri kai hi hriat ala nih loh avangin African Swine Fever a nih mai rinna a awm mek a ni. He hri leng mek zirchiang tur hian Vawiin hian Aizawl atangin mithiam te tan kal dawn a, African Swine Fever hi a nih hlauh chuan tuna Vawk la awm te pawh suat vek a ngai dawn nia thudawn a ni.

'Nipui Fehchhuah' nei

MNF Thalai, MNYF Hqrs. chuan Serchhip bial Assembly bye-election neih tur denchhenain Inrinni khan Thenzawl-ah 'Nipui Fehchhuah' Street Campaign an nei a, he hunah hian MNF Official Candidate, Vanlalzawma bakah MNYF President, Er. Lalrinawma leh David Zohma-ngaiha, AMC Councillor ten thu an sawi a ni.

Isua thawhlehna ni hmang

Nimin April 4, 2021 (Pathianni) kha Kris-tian te ni pawimawh, Isua Krista thihna hneha a thawhlehna ni, Easter Sunday a ni a, Kohhran hrang hrang chuan urhsun taka hmangin inkhawm an nei a, Kohhran thalai tam takin zing khawvar hmain kawtthler hrang hranga rimawi nen Isua thawhlehna thu hi an puangchhuak bawk a ni.

Ni tlak hma loh chuan Vote thlak tumlo

Election Commission of India (ECI) in Serchhip bye-election neih hun tur a bithliah chu tih danglam ala awm lova, Seventh-day Adventist Church-a Executive Secretary chuan vote thlak hun tihdanglam a nih loh chuan Ni tlak hma chuan vote an thlak loh mai dawn thu an sawi. Vote thlak ni tura ruahman (April 17), Inrinni a nih chungchang ah Seventh-day Adventist Church-a Executive Secretary, Lalnilawma Colney chuan inthlan hun sawn tura an ngenna chu a hlawhtlin ngei an rin thu leh a lo hlawhtling lo a nih chuan an Kohhran mite chuan vote an thlak loh mai dawn thu sawiin, ni tlak hnu a thlak theih a nih erawh chuan chumi hun chu an nghah mai tur thu a sawi a. ECI ruahmanna in Mizoram-a Election Office chuan Mizoram puma an member zat leh Serchhip Contituency chhung a member an neih zat an zawtin an chhang tawh niin a sawi bawk.