Chanchin thar thenkhat :

Work Plan & Budget sawiho

Nimin khan School Education Minister, Lalchhandama Ralte hovin Aizawl-a SCERT Seminar Room-ah Samagra Shiksha Annual Work Plan & Budget 2021-22 thlirho a ni a, he hunah hian Minister chuan tunhmaa New Delhi-a appraisal leh PAB Meeting neih thin chu hrileng avangin Online-a neih a tul leh dawn tih sawiin, Online-a Appraisal leh PAB Meeting neih hunah pawh Mizoram tan thahnemngai taka thawk turin a ngen a ni. Samagra Shiksha Annual Work Plan & Budget 2021-22 ah hian Secondary leh Higher Secondary School hawn thar tur te, Balvatika (Pre-school) hawn thar dan tur te, naupangin thiamna tak tak an neih theih nana zirna kalphung thar neih dan tur bakah District thar pathum tana DIET thar hawnna tura rua-hmanna leh thil pawimawh dang te sawiho a ni a, heng rawtna chi hrang hrangte hi Govt. of India-ah thehluh a ni dawn a ni.

Hremna na tak pek phut

MHIP Sesawng Branch chuan thuchhuah siamin April 15, 2021 zan khan Kapmawia s/o R. Salsawma, Sesawng chuan Lalthahuni chu hnek thluin, chemte-a thah tumin vawi 4 a vit zui niin an sawi a. Hetianga hmeichhe awmnem zawk kutthlak a ni leh thah tuma chemte-a vittu hi an dem takzet tih sawiin, Lalthahuni thah tuma beitu hi a na thei anga hremna pek ngei an phut thu an sawi a. Lalthahuni inenkawlna senso te tum sak tur leh a fate nen an inenkawIna pawh pe vek tura Kapmawia hi an phut thu an sawi bawk.

Adventure Club in chawimawi

Zotrek Adventure Club chuan an member pahnih, Aizawl atanga Siaha thleng ke-a kal Romalsawma, Mission Vengthlang leh Vanro-mawia, Bawngkawn te chawimawina hun nimin khan Aizawl Press Club-ah an hmang a, he hunah hian Zotrek Adventure Club hotute chuan, mi tumruh leh midang fuihna tura Adventure Sport chawisangtute hi chawimawi an phu an tih thu leh chhuanawm an tih thu an sawi a ni.

MPCC in lawmawm an ti

Mizoram Pradesh Congress Committee (MP-CC) chuan Serchhip bial MLA bye-election 2021 Pathian hruaina-a neih zawh a ni ta chu lawmawm an tih thu sawiin, Serchhip bial-in MLA tha tak a neih ngei pawh an beisei leh an duhsak thu an sawi a. Congress Party Candidate tana theihtawpa tang a, buaipui a, vote hlu tak petu Serchhip bial mipuite leh hmun hrang hranga theihtawpa lo tang te chungah lawmthu sawiin, Pathian zarah hlawh-tlinna an chang a nih chuan bial tana mi nghet leh rinawm, bial mipuite harsatna sutkian puitu MLA a nih theih nan theihtawp chhuah an tum thu an sawi bawk.

PC Party in lawmawm ti

Peoples' Conference (PC) Party chuan nimin khan an President, Lalhmangaiha Sailo hovin Aizawl-ah an Office-ah OB Meeting an nei a, he hunah hian an President chuan boruak muanawm tak hnuaia tluang taka Serchhip A/C bye-election neih zawh a ni chu lawmawm a tih thu sawiin, Candidate leh campaigner-ten Party mal leh political party beih leh sawiselna aia policy an sawi uar chu lawmawm a tih thu a sawi a. Sawrkar Official leh MPF te thawhrimna leh khawng taka campaign leh inthlan an thunun chu fakawm a tih thu a sawi bawk.

SWD Minister in chawimawi

Social Welfare Minister, Dr. K. Beichhua chuan nimin khan Upa te puala hmalatute hnenah chawimawina a hlan a, Social Welfare & Tribal Affairs Department Directorate Conference Hall-a he hun hmanna ah hian SWD Minister chuan chawimawina dawngtute chu Upa te puala an hmalakna entawntlak a tih thu leh ropui a tih thu sawiin, thangtharte tan entawn tur tha tak min hnutchhiah a ni, a ti. Chawimawina dawngtute hi MUP Ramthar Sihpui Unit (Day Care Centre); Salvation Army, Aizawl Bazar Corps (Over 60's Club); Dawrpui Presbyterian Kohhran (Upa te Chawlhbuk) leh Aizawl North Treasury, Finance Department, Treasury Square (Pensioner Recess Room te niin Rs. 20,000/- leh thuziak hlan an ni.