MNF Party in Political Training buatsaih

MNF Party chuan nimin khan Serchhip-a Veng pali huamchhung ami te tan Serchhip Hmar Veng YMA Hall-ah Political Training neiin he hun hi MNF Adviser, Robert Romawia Royte chuan hmanpuiin Serchhip bial bye-election neih turah MNF in hneh taka chakna an chan a rin thu a sawi.

Serchhip Hmar Veng, Bazar Veng, Chanmari Veng leh Field Veng-a MNF Party hruaitute tana nimin-a Political Training Ser-chhip Hmar Veng YMA Hall-a neih ah hian MNF Adviser, Robert Romawia Royte chuan tun tuma inthlan neih tur chu kum 2018-a MLA inthlan ang kha a ni lo tih sawiin, khatih lai kha chuan Kohhran pawl tin, NGO leh political party tinin khawi party nge sorkar dawn tih tuman an hre lo tih a sawi.

Robert Romawia Royte chuan tunah chuan April ni 17-a vote thlak ni leh thlak hnu thlengin Zoramthanga chu Chief Minister a la nizui zel dawn tih hriat vek a nih thu sawiin, “Chuvangin Serchhip mipuite hi kan fing tawh turah ka ngai. Hneh takin he bial-ah hian MNF party-in chakna kan chan hi ka ring em em a ni. A chhan chu 2018 angin CM tur nge tur lo khaikhina vote thlak a ngai tawh lo. Unit pawh nei lo, Unit a ngai lo, Movement hi thlangtling ang titute hun a liam tawh,” a ti bawk.

Robert Romawia Royte chuan Mizo-ram-ah District Hqrs. 11 a awm mek tih sawiin, heng zinga 10-te chuan Bialtu MLA-ah Rulling party mi an nei tih pawh sawiin, Serchhip chiah hian opposition MLA neiin tunah hian Ruling party MLA neiha hmasawnna chak taka kalpui thei turin remchanna rangkachak (Golden chance) a neih mek thu a sawi.

Robert Romawia Royte chuan Serchhip bial tihmasawn tur hian MLA Fund a tawk lo tih pawh sawiin, Sawrkar lamtang bialtu, Department Fund-pui, sawrkar Fund-puia thuneitu leh haichhuak theitu an mamawh thu a sawi bawk.