Chanchin thar thenkhat :

Lirthei chesual-ah nunna chan

Nimin chawhma lam-a Khawlailung khua-a lirthei-a vanduaina thleng-ah mi pakhat in nunna chanin midang pakhat in hliam a tuar bawk. Khawlailung atanga thudawnna in a sawi danin nimin chawhma lam khan Tuichangral lama kawng siam hna thawk mektu, Bhavya Company hnuaia thawk Truck (Hyva) chu Khawlailung khuaa Bike pakhat nen an insu a, he Bike-ah hian mi pahnih chungin Bike hnunga chuang Thantluanga (41), Khawlailung chuan hliam na tak tuarin Serchhip damdawi In panpui a nih hnuah a boral a, Bike khalhtu Rodawla, Khawlailung khua vek chuan hliam na tak a tuar bawk. He vanduaina thlenna hmun hi Khawlailung kawtchhuah, khaw-chhung lunlai tak niin kawng peng atanga Main Road-a lut Bike chu Truck hian a rawn su a, hemi hnu hian a chil zui nia thudawn a ni bawk.

Saihapui ‘V’ luhkha khar rih

COVID-19 hri dan zel tur venna atan Assam atanga Mizoram luhka, Saihapui ‘V’ chu khar rih a ni. Hemi chungchangah hian Kolasib District Magistrate thuchhuah in a tarlan danin COVID-19 thawh hnihna (2nd wave) avanga India ram hmun hrang hrang leh Mizoram chhung District hrang hrangah te hri kai an pun chhoh zel avangin Kolasib District chhung leh Mizoram chhunga mipui te kan lo him zawk nan State thenawm Assam atanga Mizoram luhna, Saihapui ‘V’ (entry point) chu tun atanga thu leh awm hma khar a ni tih a tarlang a ni.

Kawng siam mek enfiah

Chalfilh Group YMA leh PWD National Highway Division-II hotute chuan nimin khan Khawruhlian leh E. Phaileng inkara Double Lane KM 17.5-a thui, ECI Company ten an laih thar mek chu enfiahin hnathawktu ten an lo dawngsawng a, lungrem thalo te chu remthat leh tura phawh leh niin tui luankawr leh an hnathawh hrang hrang tha lo laite siamtha tura hrilh an ni bawk. Helai kawng hi kumin March thla a zawh tur kha ni mah se hri leng avangin thla 9 hun pek belh an ni.

Raltlan 2686 chhinchhiah

Myanmar ramchhung buaina avanga Mizo-ram-a rawn raltlan te Central YMA in an hnuaia Branch hrang hrangte hriattir tura a tih anga tun thla ni 14 thlenga report a dawn chu Aizawl khawpui chhung Branch YMA 46 atangin mi 1047 leh Aizawl khawpui pawn atangin mi 1639, avaiin mi 2686 an ni a. Heng mite chhawmdawlna atan hian Central YMA chuan Rs. 14,61,400/- zet a sem-chhuak nghalin, chhawmdawlna hi sum fai-a pe lovin, ei tur leh mamawh dang pek tura ruahman a ni.