DC leh SP ten Bazar leh Sample lakna hmun an tlawh

Serchhip District Bawrhsap leh Superintendent of Police te chuan nimin khan sawrkar mi pawimawh dangte nen Serchhip-a hri leng laka mipui himna tura kaihhruaina siam bawhzui a nih dan an enfiah.

Serchhip District Bawrhsap, Kumar Abhishek leh Superintendent, Stephen Lalrinawma te bakah sawrkar mi pawimawh te hian Serchhip Bazar leh a chhehvel tlawhin tunhnaia hri leng avanga inkhuahkhirhna kalpui mek bawhzui a nih dan te an enfiah a, Serchhip khawpui lunlai, Bazar leh a chhehvel huamtu Serchhip Kawnpui VLTF te kawmin sawrkar in inkaihhruaina a siam te khauh taka kenkawh anih theih nan a theihtawp chhuah thar leh turin a hrilh a, hri a darh zelloh nan a sawrkar in SOP a siam te chu zawm anih anih ngei theihna turin VLTF te chu tan la turin a hrilh a ni.

Hemi hnu hian Serchhip District Hospital-a COVID-19 Sample lakna leh Rapid Antigen Test hmanga Sample enfiahna te tlawhin Hospital hotute nen inkawmna an nei a, Sample Collection Centre chu a awmna hmun (District Hospital kawt-a Morgue House) chu a ualau avangin hmun him deuh zawka sawn anih theih nan a hmala turin an ngen a, District Hospital hotute chuan tun dinhmunah chuan Hospital hnai ah hmun an neih remchan mai loh thu lo sawiin, hmun remchang zawk lo ngaihtuah erawh an tum tih an sawi a, Sample Collection Centre hi motor kawngpui in a paltlang avangin nimin vek khan ‘One Way’ tura tih nghal a ni a, Bazar lam atangin Hospital peng-ah lirthei an lut thei anga, chhuah leh lam chu Tuizemdum kawn atanga Tuikhuah Veng lamah chauh a theih tawh thung dawn a ni.

Nimin-a heng hmun tlawhna ah hian DC leh SP te hi Addl. DC, Lalmuansanga Ralte, Addl. SP PC. Laltanpuia leh SDO (Sadar), C. Laltleipuii bakah Officer thenkhat ten an tawiawm a ni.