Latest News

Bial pawn mi nge kan thlan dawn Bial chhung mi tiin ngaihtuahna kan hman a ngai - Lal Thanzara

MPCC Campaign Committee Chairman, Lal Thanzara chuan Serchhip Bial Assembly bye-election neih turah, “Bial pawn mi nge kan thlan dawn Bial chhung mi tiin ngaihtuahna kan hman a ngai a ni,” a ti a. INC Candidate, PC. Laltlansanga pawhin Ruling MLA bial pawh ni ila hmachhuan viau tur a awm vak a rin loh thu a sawi.

MPCC Campaign Committee Chairman, Lal Thanzara hian nimin khan Serchhip Press Club-ah thuthar thehdarhtute kawmin Serchhip bial mipuite chu Lal Thanhawla term 7 zet ram rawngbawlnaa hlangkaitute an nih avanga lawmthu sawiin, tun tum bye-election chu tum dang aiin danglamna leh pawimawhna a nei tih a sawi a, kum 2023 General Election atan pawh Party tin tan nghawng nei thei tur a ni tih sawiin, hei vang hian mipuite pawh fimkhur taka ngaihtuahna seng tura a duh thu a sawi a. Mizoram-a Congress a sawrkar laiin Assembly House chhungah Ruling leh Opposition inthliarna a awm lo tih sawiin, tun tuma bye-election neih turah hian ZPM Candidate, Lalduhoma chu thlantlin leh nih chuan Serchhip bial hmasawnna haichhuak tur chuan a rintlak loh ber a rin thu leh MNF sawrkar chuan a thil sawi chu an ngaihthlaksak a rin loh thu a sawi a, “Lalduhoma hi khawngaih tur ni se chuan a MLA puite kha a khawngaih ber tur an ni a, anni pawhin Lalduhoma thlavang hauha MLA atanga bân ve tura an kar ngam loh laia Serchhip mipuiten Lalduhoma lo khawngaih chu awmzia a awm lovang. Inkhawngaih tur nise chuan Serchhip tlangval, INC Candidate chu engvanginnge in khawngaih loh ang?” tiin INC chuan Serchhip bial chhung mi ngei Candidate an neih thu a sawi bawk.

He hunah hian INC Candidate, PC. Laltlansanga pawhin tuna kan sawrkar hrawn mek dinhmun chu a chau hle nia sawiin, Ruling MLA bial pawh ni ila hmachhuan viau tur a awm vak a rin loh thu a sawi a, tun tum by-election-ah hian Candidate-a Bial chhung mi 3 awm zingah ani chu party lian-a ding, tlin theihna chance nei sâng ber a nih hmel tih sawiin, bial chhung mi MLA neih duhte rilru chu hmun khata a luankhawm a ngai a, amah tanpui turin a sawm bawk.

MPCC Media Department Chairman, Dr. Lallianchhunga pawhin MNF chu mi hausa sawrkar a nih thu leh mirethei leh pachhia te tana chhenfakawm sawrkar a ni lo tih sawiin, cheng nuai 3 sem an intiamna an tihhlawhtlin theih loh laiin Aizawl-ah PAHOSS hnuaiah mi hausa-te hnenah cheng nuai 20/30-te chu rulh let ngai lovin an pek thu leh Assembly Speaker ngei pawhin cheng nuai 141 ngawt a thlawnin a dawng dawn tih a sawi bawk.

Comments

Chhiar Hlawhte