Latest News

Inthlanna neih ah lawm

Serchhip District Bawrhsap, Kumar Abhi-shek chuan Mizoram tluka inthlanna felfai, thianghlim leh muanawm ala tawng ngailo tih a sawi.

Serchhip Bial Assembly bye-election neih ni, Inrinni kalta a a Pisa-a amah kawmtu thuthar thehdarhtute zawhna chhangin Serchhip DC, Kumar Abhishek chuan, Serchhip bial bye-election neihah khawi atang mahin complaint liantham an dawn loh thu a sawi a. “Hmun thenkhatah Flag tar inlakthlak tir te chu awm mah se, hei erawh hi chu buaina liantham a tling lo a. Complaint lian tham kan dawng lo a ni,” a ti.

He inthlan-a Returning Officer ni bawk Kumar Abhishek chuan ECI in inkaihhruaina an ruahmanna hnuaiah tha taka inthlanna neih a nih thu leh MPF in tun hma atang tawhin inthlanpui ah hian inthlanna buaipuitute an lo tanpui tawh thin thu leh tun tumah pawh hian an tangkai hle tih sawiin, “India ram hmun hrang hrangah inthlanpui hi ka lo hmachhawn ve fo tawh a, Mizoram tluka inthlanna felfai, thianghlim leh muanawm hi ka ka tawng ngai lo,” a ti.

Serchhip SP, Stephen Lalrinawma pawhin boruak ralmuang tak hnuaia inthlan a nih theih nan theihtawp an chhuah thu a sawi a, hmun thumah darkar 24 chhung duty tura an indah thu leh, dan leh thupek bawhchhiatna kawngah buaina liantham engmah an neih loh bakah complaint lian tham pawh an dawn loh thu te, dan leh thupek kengkawh turin venghimtu Police 260 ruaiin, heng zingah hian CAPF 78 an awm thu a sawi bawk.

Mizoram People's Forum (MPF) Ser-chhip District President, Rev. Zohmunmawia pawhin Party-te nena thawhhona an siam chu party hrang hrang ten an zawm tha tih sawiin, lawmawm an tih thu a sawi a. An hmuh leh hriat ang chinah buaina leh harsatna engmah a thleng lo tih sawiin,  “Puanhnuai thil te chu a lo awm a nih pawhin, kha'ng kha chu indan sen reng pawh a har a ni,” a ti bawk.

Comments

Chhiar Hlawhte