Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Chanchin thar thenkhat :

ASF Epicentre-ah puang

Mizoram Governor chuan Sub-Section (1) Section (6) of the Prevention and Control of Infectious and Contagious Disease in Animals Act 2009 in thuneihna a pek angin Aizawl, Lunglei, Siaha leh Serchhip District chhunga Veng leh khaw thenkhat te chu African Swine Fever (ASF) Epicentre-ah a puang a. April 15, 2021 khan ICAR-NIHSAD, Bhopal chuan Mizoram atanga Sample thawnthlak te chu ASF vei ngei an ni tih a finfiah a. Sawrkar laipui duhdan angin Mizo-ram State sawrkar chuan hma la nghalin heng te hi ASF Epicentre-ah puan niin Aizawl District-ah Bawngkawn, Armed Veng leh Edenthar te an ni a, Lunglei District-ah Lungsen leh Lunglei Electric Veng niin Siaha District-ah Vaihpi-I leh Serchhip District-ah Keitum khua te an ni. Heng khua leh Veng atanga KM 1 bial chu ‘Infected Zone’ ah puan niin, KM 10 bial chu ‘Surveillance Zone’ ah a puang bawk a ni.


Road Protection Squad in rel

Nimin khan Lunglei-ah District Road Protection Squad chu an Chairman Lunglei DC, Kulothungan A hovin a Pisa-ah an thukhawm a, Lunglei khawpui chhung kawng humhalh chung-chang leh mipui te an lo him zawk theihna tura hmalak dan tur an sawiho. He Meeting-ah hian Lunglei khawpui chhungah Inspection ngawrh taka kalpui ni se tih an lo rel tawh angin District Road Protection Squad member-te chu Group hnih (2) ah inthenin thla khatah vawi khat tal inspection an nei thin dawn a, khawpui chhunga vantlang kawng nek chep, tuiluankawr chhia, kawngpui dunga In sakna bungrua dah, parking phal lohna a motor hun, kawngpui-a tui/thli luan tir etc. te enfiahin a tul angin hma an la dawn a ni.


Dan bawchhia 74 te man

Hri leng avanga mipui khuahkhirhna siam thar leh hnu nimin khan Aizawl District-ah COVID-19 hri danna atana sawrkar dan siam bawhchhia mi 74 zet man nghal an ni a, an vai hian hmai tuamna (Mask) hmanglo an ni.Lawngtlai-ah SEDP atangin Ar note sem a ni

Lawngtlai District chhunga Sawrkar Flagship programme, SEDP hnuaia Ar vulh thlangtu chhungkua 20 hnenah nimin khan Ar note pek an ni. SEDP hnuaia Ar vulh thlangtu chhungkua 20 hnenah Lawngtlai District AH & Vety Department in Ar note an pekchhuah hi 1st Installment atana SEDP dawng tur thlanchhuah te an ni a, heng Ar note dawngte hian February thla khan Ar In sakna tur leh Ar chaw pekna tur hmanrua leina leh Ar chaw leina tur pawisafai an lo dawng tawh a, tun tumah hian Ar note pek leh an ni.

Tun tuma Ar note an pek hi Tanhril-a AH & Vety Department Ar awp keutirna, Hatcheri atanga Artui keu hlim an lak a ni a, a phurhna kawng a thui tham avang leh khua a lum avangin Ar note hi an thi nasa hle nia thudawn a ni a, hemi avang hian an dawn tur zat Ar note 200 an dawng thei rih dawn lova, an dawn bak la bangte chu Nodal Department te nena ruahmanna siam a la kalpui tur a ni dawn a ni.


Dilna lut 44,380 tling tawh

Aizawl Traffic SP, Rodingliana Chawngthu chuan, nikum March ni 25-a Mizoram inkharkhip hmasa ber kalpui a nih atanga nimin tlai dar 3:30 thlenga Online kaltlanga Traffic Police hnena chhuah phal dilna an dawn zat chu 44,380 a nih thu leh heng zinga 30,209 te chu phalna pein mi 14,171 te dilna chu hnawl sak an nih thu a sawi a. Inkhuah-khirhna kalpui tan atanga nimin chawhnu dar 4:40 thleng khan Traffic dan bawhchhia mi 44 an man tawh a, heng zingah mi 28 te chu pawisa chawitir niin an sum chawi chu Rs. 9500 a tling a ni.


Vawk 1098 zet thi tawh

Tunhnaia Mizoram-a Vawk natna hri leng avanga Vawk thi chu 1098 zet a tling tawh tih AH&Vety Department hotute chuan an sawi a, Vawk thi te hi Lunglei District-ah 666, Mamit District-ah 232, Aizawl District-ah 32 leh Ser-chhip District-ah 14 te niin nimin khan Vawk thi 42 a awm bawk a ni. Mizoram-a Vawk thi tamna ber Lungsen khua ah chuan Vawk 640 zet thi tawhin Vawk 417 vel ala dam a, Lunglei-ah chuan Vawk 91 chu hri vang hian an thi tawh bawk a ni.


ZNP in hruaitu hnawtchhuak

ZNP Party te chuan nimin khan thuchhuah siamin tun thla ni 15-a ZNP General Hqrs. Emergency Committee chuan ZNP President, JM. Vura leh Vice President, H. Lalrinmawia chu ZNP Constitution dan kalh-a an chet avangin a hnawtchhuak tih an tarlang a. JM. Vura hian Party Bank account-a pawisa lut tur a lo dan avang leh ama hamthatna tura ZNP Party a hman avangin leh Office kal ngam lova Press Release a lo siam ve ringawt avangin ZNP Primary Member atanga hnawhchhuah a nih thu leh Vice President, H. Lalrinmawia pawh hi Bank Passbook keng kual a ZNP Bank Account a lo freeze tir avangin Primary member atanga hnawhchhuah a ni tih an tarlang a ni.


MNF in lawmthu an sawi

MNF Party chuan Serchhip bial bye-election chu Pathian hruaina in tluang taka zawhfel a ni ta tih sawiin, Inthlan hlawhtlinna tura hun hlu tak, tha leh zung senga vote thlaktu, Serchhip bial mipui zawng zawngte chungah lawmthu an sawi tih thuchhuah siamin an tarlang a. A bik takin an candidate vote puitu zawng zawng te chungah thinlung taka lawmthu an sawi thu leh Inthlanna felfai tak neih a nih theihna tura thawktu Official zawng zawngte, dan leh thupek kengkawhtute leh inthlanna thianghlim a awm theihna tura hmalatu, MPF chungah lawmthu an sawi tih an tarlang bawk.

Comments

Popular News (Last 30 Days)