Screening Point-a test ti lo lirthei engmahin Mizoram an lut thei lovang - Health Minister

Health Minister Dr. R. Lalthangliana chuan, “Screening Point-a test ti lo lirthei engmah in Mizoram an lut thei lovang,” a ti.

Health Minister hian nimin khan Vairengte Screening Point chu tlawhin thawktute leh Vairengte khawtlang hruaitute a kawm a, he hunah hian Health Minister chuan Vairengte chu COVID-19 hri dona kawnga hmatawngtu pawimawh tak a nih rualin ramri ven kawnga khawtlang anga an hmalakna te chu entawntlak a tih thu a sawi a. COVID-19 hrileng thawhhnihna lo thleng mek dona kawngah pawh tha thlah lova sawrkar hmalakna tichaktu ni chhunzawm zel turin Vairengte NGO hruaitute chu a chah a ni.

Health Minister chuan Vairengte Screening point chu rampawn atanga mihring leh bungrua luhkapui ber a nih avangin endikna chu uluk leh ngawrh taka kalpui a tul thu a sawi a, “Screening Point-a test ti lo lirthei engmahin Mizoram an lut thei lovang,” tiin, thawktu indaihlohna avanga lirthei tlantlang palh a awm loh nan a tul a nih chuan Police duty dah belh a nih tur thu a sawi bawk.

Health Minister hian Kolasib DC Conference Hall-ah Kolasib District Level Task Force te pawh kawmin Kolasib-a sawrkar-a mawhphurtute, tlawmngai pawl leh khawtlang mipuiten thawhhona tha tak an nei thin chu lawmawm a tih thu a sawi a, District dang a buaipui ngai ve lo thil tam tak a awm chungin, tha taka mawhphurna hrang hrang hlenchhuah a ni thin chu fakawm a tih thu a sawi bawk.

Dr. R. Lalthangliana chuan hri do nan chuan ramri kan-a lolut te endik a pawimawhzia sawiin. Vairengte-ah pawh hmaih palh leh chhuah palh awm lovin, lirthei leh mihring lo lut tur te chu kim taka endik hna kalpui a nih tur thu a sawi a. Hri dona kawngah hian Sawrkar department hrang hrang karah thawhhona tha neih a tul thu leh hmalakna chak zawka kalpui tur chuan kalphung pangngai pela hmalak a ngaih chang pawhin inhriatthiamna nena indawrtawn a pawimawh thu a sawi bawk.

He hunah hian National Health Mission (NHM) Mission Director, Dr. Eric Zomawia chuan Mizoram-a vaccine kalpui dan tlangpui sawizauna neiin Vaccine 1,32,996 pekchhuah a nih tawh thu leh heng zinga 1,01,996 te chu Dose khatna niin dose hnihna la mi 31,000 an awm tawh thu a sawi a. April 15, 2021 chu nikhat-a vaccine pekchhuah tam ni ber niin mi 12,438 hnenah vaccine pek an nih thu a tarlang bawk. He hunah hian Bairabi leh Zawlnuam Medical Officer te pawhin ramri kaltlang-a rawn lut tur enfiah hna an kalpui dan te an sawi bawk a ni.