Chanchin thar thenkhat

A&C Minister in hawng

Art & Culture Minister, R.Lalzirliana chuan nimin khan Mizoram State Museum, Aizawl-ah Internet kaltlanga Museum bungraw vawnthat leh mipui hmuha pholan a nih theihna tura hmalakna, Digitization of Museum Objects a hawng. Sawrkar laipui Ministry of Electronics and Information Technology hnuaia Centre for Development of Advance Computing (CDAC) leh Ministry of Culture tangkawpin India rama hmarchhak State hrang hranga Museum ten an bungrua mipui hmuh theih tura internet kaltlanga an phochhuah theih nan leh digital hmanga vawnthat nan Museum Portal northeastheritage.in a buatsaih a, hetah hian Mizoram State Museum pawh telin Mizoram State Museum hian tunah hian bungrua 26 a thehlut tawh a ni. CDAC hian Mizoram-a Digitization of Museum Objects kalpui a nih theih nan cheng nuai 4.5 hu bungrua a rawn thawn a. CDAC vek hian JATAN 3D Museum Builder Software leh Accession Register Software a buatsaih sak bawk a ni.

Assembly Speaker in tlawh

Mizoram Legislative Assembly Speaker, Lalrinliana Sailo chuan niminpiah khan Arunachal Pradesh Assembly Secretariat tlawhin National E-Vidhan Application (NEVA) an kalpui dan chu NEVA mithiamte leh official-te nen chipchiar takin an zirho a, NEVA hi Dan siamna hmanrua tichak tura duan niin Paper hmang lova Information inpek tawnna remchang niin ram puma State Legislature zawng zawng inthlunzawmna tur a ni. Hemi hma tun thla ni 3 khan Speaker hian hemi chungchangah hian Assam Legislative Assembly Speaker Hitendra Nath Goswami chu a lo kawm tawh bawk a ni.

Power man tihsan duhlo

ZPM Party buatsaihin nimin khan Aizawl Vanapa Hall kawt-ah Mizoram sawrkarin Electric (Kawlphetha) chhitman a tihsan duhloh lantirna neih a ni a, he hunah hian an Party hruaitu ten thu an sawi a ni.