Latest News

Health Minister hovin Mizoram-a COVID-19 dinhmun thlirhona neih a ni

Health Minister Dr. R. Lalthangliana hovin nimin khan SAD Conference Hall-ah Mizoram COVID-19 dinhmun thlirhona neih a ni a, Home Minister Lalchamliana leh sawrkar mi pawimawh dang te an tel a ni.

He hunah hian hian India rama COVID-19 Second Wave lo hluar leh mekin Mizoram a nghawng dan sawiho a ni a, tunhnaia Mizorama COVID-19 positive case pun dan report ngaihthlak niin March ni 29, 2021 atanga April ni 15, 2021 inkarah positive 257 hmuhchhuah niin Lengpui Airport-a lo thleng zingah positive 110 hmuhchhuah a ni a, an zinga 84 hi Lengpui Airport an rawn thlen hlima Lengpui Airport Screening Point-a RAgT hmanga hmuhchhuah niin, midang 26 hi Lengpui Lengpui Airport Screening Point a RAgT negative, a hnua positive tih hmuhchhuah leh an ni.

Vairengte kaltlanga rawn lut zingah positive 29 hmuhchhuah niin an zinga 23 hi Screening point-a positive tih hmuhchhuah an ni a, midang 6 hi Screening Point-a negative, a hnua positive leh an ni. Kanhmun Screening Point-ah positive 2 hmuhchhuah an ni a, Zokhawthar kaltlanga rawn lut Screening Point-a negative, a hnua positive leh si pakhat a awm bawk. Positive hmuhchhuah thar zawng zawng zinga 115 hi tualchhunga hmuhchhuah an ni a. Kumin January thla khan positive 156 hmuhchhuah an ni a, February-ah 51, March-ah 53, April thla-ah ni 14 thleng positive 246 hmuhchhuah an ni bawk.

He thutkhawm ah hian Lockdown puan rup rup a remchan loh avangin a tul dan azirin Containment Zone/Micro-Containment Zone puan thin a nih tur thu tarlan a ni a. Mizoram-a COVID-19 hri hluar chak dan thlirin mipuite chetvelna khuahkhirh a tul bakah chhungkua, thianho leh pawl anga thiltihkhawm leh puipunna huaihawt chungchangte sawiho a ni a, sawrkarin a tul angin ruahmanna a siam zui dawn a ni. Mizoram luhka (entry point) hrang hrang atanga rawn lut te uluk leh khauh lehzuala lo endik a tul thu sawi a ni a, COVID-19 sample test tun aia nasa zawka kalpui a tul thu leh Random Testing kalpui a tul thu sawilan a ni bawk.

COVID-19 dona kawnga indaihlohna chungchang sawiho niin hemi chhawk zangkhai tura volunteers lak leh chu Chief Minister-in a phal tawh thu tarlan a ni a, Mizoram Kohhran Hruaitute Committee (MKHC) hruaitute pawhin COVID-19 dona kawnga sawrkar hmalakna tha an tih thu sawiin, sawrkarin mipuite himna atana ruahmanna an siam apiang chu tha taka zawm zel an tum thu an sawi a ni.

Comments

Chhiar Hlawhte