Raltlan thenkhat RAY Building-ah dah mek an ni

Sipai in Myanmar-a thuneihna an hnehchhuh avanga sahimna zawnga Mizoram-a raltlan lo lut, Aizawl-a awm thenkhatte chu Falkland Veng-a RAY Building-ah dah mek an ni.

Myanmar ramchhung buaina avanga Mizoram-a raltlan lo lut tam tak chuan Mizoram-a an chhungkhat lainate leh an thiante an bel a. Chutianga belh tur nei ve lo te chu vantlang In-ah te an raltlanna khaw hotute ruahmanna angin dah an ni a. A tam ber hi hakthlak pawh keng mumal lo leh eitur keng lo an nih avangin an eitur buaipui a hautak sawt hle ni a thudawn a ni. Tun dinhmunah hian raltlan hi 1,500 chu an tling tawh niin Official lam chuan an sawi a, a buaipuitu thenkhat chuan hei aia tam daih hi an nih tawh an ring a. Aizawl khawpui a awm ringawt pawh hi 400 vel an ni tawh a hriat a ni a. An zinga a tam ber hi Police leh Fire Service a thawkte an ni.

Tunhnai khan Chief Secretary, Lalnunmawia Chuaungo hovin Mizoram Kohhran Hruaitute Committee (MKHC) leh NGO Coordination Committee aiawhte chuan raltlante lo tuamhlawm dan tur hi an relho a. Sawrkar laipuiin raltlante thawnkir tura Mizoram sawrkar a nawr mek lai a sum leh pai lama raltlante lo tanpui chu sawrkar laipui mitmei ven a nat thu sawrkar aiawhte'n an sawi a. NGO Coordination Committee leh MKHC te chu raltlante tanpui kawnga tha thawh turin ngen an ni a. Hetah hian thumum awm lutuk lo mahse, Central YMA lamin an enkawlna tur sum lam buaipui tura ngaihtuah a nih thu dawn a ni.

Tunah hian MZP leh NGO United for Democracy in Myanmar chuan Mizoram-a raltlante buaipui hna hi an thawk mek a. Chutih laiin Myanmar ramri depa khaw hrang hranga lutte chu khawtlang hruaitute'n lo buaipuiin an thlenna tur leh ei leh in turte an buaipui bawk a. Sawrkar emaw, pawl lian leh Kohhran an inrawlh loh chuan harsatna thleng thei mai niin an sawi bawk.

February 1, 2021-a Myanmar-a sipaiin thuneihna an hnehchhuh hnu khan mipui rorelna tundin duhtute'n he ram hmun tinah sipai roreltute an dodal a. Tunhma ang lo takin sawrkar hnathawk dangte leh Police-ten sipai hi dodalin sawrkar kal thei lo turin an bei a. Lungawilohna lantira pungkhawm tam tak kahhlum leh tan In-a tantir an awm tawh a. Tunah hian tualchhung indona liantham chhuak mai thei dinhmunah an ding niin NGO United for Democracy in Myanmar hotute chuan an sawi a. Hetiang hi boruak a nih chhoh zel avangin raltlan tam zawk Mizoram-a an lo luh belh zel hi an rin thu an sawi a ni.