Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Serchhip Bial hmasawnna atan ka thawk chhunzawm zel ang - Lalhriatrenga Chhangte

Serchhip bial Assembly bye-election neih tura BJP Candidate, Lalhriatrenga Chhangte chuan Serchhip bial in hma a sawn theihna tura amah Vote tura Serchhip bial mipuite sawmin, Serchhip bial hmasawnna atan hna a thawh chhunzawm zel tur thu a sawi.

Nimin chhun-a Serchhip Press Club-a thuthar thehdarhtute a kawmna ah Serchhip Bial-a BJP Candidate, Lalhriatrenga Chhangte chuan Serchhip khaw mi leh sa a nih thu sawiin, a nupui leh fanau te pawhin Serchhip-ah Vote an la neih vek thu a sawi a, tun tuma Bye-election neih chu Serchhip Bial ni lo se a chuh loh tur thu sawiin, BJP chu India ram mai ni lo khawvel-a Political Party lian a nih thu sawiin, amaherawh chu Mizoram-ah erawh an lian lo tih a sawi a. Tunhma lam ah Mizoram Congress hruaitu ten BJP chu Hindu Kulmuk-ah an chhuah avangin tun thlengin Mizoram-ah an thang theilo tih sawiin, amaherawh chu BJP leh Congress Party chu a danglamna a awm chuanloh thu a sawi a. BJP deusawh chu Kristianna a ni lo tih pawh sawiin, Mizo taka a Kristian theih thu leh Mizo taka a BJP theih thu a sawi bawk.

BJP Candidate chuan Serchhip Bial-ah thlantlin a nih chuan Central-ah Ruling Party an nih avangin Mizoram sawrkar khalh ngil tur leh Central-a sum sawipui turin a tha tih a sawi a, Mizoram a changkan loh chuan India ram a changkang theilo tih sawrkar laipui in a hriat avangin Mizoram hmasawnna chu an duh hle tih a sawi a, amaherawh chu hmasawnna hrang hrang thawk turin sawrkar laipui chuan tuna Mizoram sawrkar chu an ring zo lo tih a sawi bawk.

He hunah hian Lalhriatrenga Chhangte chuan Serchhip bial-a thlantlin a nih chuan sawrkar laipui hmalakna kawng hrang hrangah hmalak a ni dawn tih pawh sawiin, heng an hmalakna tura a sawilan te hi tun inthlanna a Campaign tura rawn kal tur, DoNER Minister in a rawn puan dawn thu a sawi a. Serchhip mipuite chu BJP an zawm ngamlo a nih pawhin amah chuan a zawm ngam tih sawiin, Vote tal lo Vote ngam tura a duh thu a sawi a. Tun Ministry term kal mek-a kum hnih leh a chanve vel awm chu MLA tir ngam tura mipuite chu ngenin, Serchhip Bial hma-sawnna tura ruahmanna a neih hrang hrangte chu MLA atan tlinglo pawh nise, MLA ni lo chunga bawhzui zel a tum thu a sawi bawk.

Comments

Chhiar Hlawhte