Chanchin thar thenkhat :

MP (RS) in raltlan te tlawh

Mizoram Rajya Sabha MP, K.Vanlalvena chuan Inrinni khan North Delhi huamchhunga Jehangirpuri, Yamuna luikam-a Pakistan Hindu raltlante Camp a tlawh a, an hruaitute kawmin an dinhmun tlangpui te a zawtfiah. Jehangirpuri Refugee Camp-ah hian kum 9 vel kalta a Pakistan atanga Hindu raltlan chhungkaw 170 vel an khawsa mek a, an vaiin mi 1500 vel niin India sawrkarin heng Refugee te awmna tur hian ram acre 4 vel pein chhungkaw tinte tan tawmhulna tur a saksak a ni. Hindu raltlan te a tlawhna ah hian Mizoram Rajya Sabha MP hi Special Police Force for NE Region, Delhi Police ten an tawi-awm a. Raltlante hian an dinhmun leh harsatna tawh te lo hrilhin an hruaitute ngenna angin heng Hindu refugee ten harsatna an lo sawite chu Union Home Minister hnenah a thlen sak tur thu K. Vanlalvena hian a hrilh a ni.

Adviser to CM Office luah

Adviser to Chief Minister (Technical) Er. K. Lalsawmvela, Engineer-in-Chief, PWD (Rtd.) chuan nimin khan Chief Minister Office-ah a Office Room thar luahlutin, Chief Minister hovin hun tawite hman a ni a, he hunah hian Chief Minister, Zoramthanga chuan Er. K. Lalsawm-vela chu Mizoram tan a thiamna tangkai taka a hman chhunzawm zel a beisei thu a sawi a. Er. K. Lalsawmvela pawhin dinhmun pawimawh tak pek a ni chu a lawm thu leh, a hmaa hna thawh turah te leh mawhphurhna te theihtawp chhuah a tihhlawhtlin zel a tum thu a sawi bawk. He hun hi Addl. Chief Secretary, J.C Ramthanga chuan kaihruaiin Home Minister, Lalchamliana pawhin he hun hi hmanpuiin thu a sawi a ni.

Ragging chungchang sawiho

Nimin khan Aizawl-a BN College of Nursing huaihawtin zirna In-a zirlai lut thar zawk te chunga hleilenna awm thin, Ragging chungchang sawihona neih a ni a, India ramchhung hmundang angin Mizoram-ah chuan ragging hi a thlen tam loh thu he hunah hian tarlan a ni bawk.

College-a bawm dawh rel

Nimin khan Mizo Students’ Union (MSU) General Hqrs. hruaitute leh Aizâwl City College Joint Students’ Union (ACCJSU) hruaitute chu Aizawl-ah thukhawmin Mynamar ram buaina avânga kan unau harsatna tuar mêkte chhawm-dâwl tûrin Aizâwl khawpui chhûnga College tinah bâwm dawh nise an ti.

Joint Platform siam dawn

Serchhip bial-a Assembly bye-election tun thla ni 17-a neih tur atan MPF Serchhip District chuan Vawiin chawhnu dar 1:00 hian Serchhip Bazar-ah Joint Platform an buatsaih dawn a, he hunah hian he inthlanna chuh tur Candidate te chu minute 15 theuh thusawina hun pek an ni dawn a ni.