MNF in an Candidate tling turin an duhlo emaw tih mai tur a ni - Zodintluanga

Mizoram Pradesh Congress Committee (MPCC) hruaitute chuan Serchhip bial bye-election nei turah MNF Candidate, Vanlalzawma chu an Party chuan tling tak tak se an duhlo em ni tih tur a nih thu nimin khan thuthar thehdarhtute hmaah a sawi.

Nimin chawhnu-a Serchhip Press Club-a thuthar thehdarhtute an kawmna ah MPCC Treasurer leh Congress Legislature Party Leader, Zodintluanga chuan Serchhip bialtu MLA atana thlan Lalduhoma insum duh loh vang leh Speaker luhlul vanga thla ruk ngawt Serchhip in MLA an neih loh phah chu chapona pakhat vang a nih theih thu a sawi a. Mizoram-a kan hun kal tawh ah Bye-election chu Ruling Party ta tur tih chu mipui ngaihdan a ni tlangpui tih sawiin, tun tuma Bye-election neih turah erawh a tling tur sawi a harsa kan ti vek tih a sawi.

Zodintluanga chuan MNF Party chuan an an Candidate chu tling turin an duh tak tak lo em ni tih mai tur a nih thu sawiin, an Vice President hi MLA atan duh ni sela chuan an sawrkar tirha Aizawl West-I bye-election ah khan an din tir daih tawh tur thu a sawi a. Hei bakah hian Serchhip bial-ah hian tling turin duh nise Cabinet Minister ni turin Chief Minister in a tih a rinawm thu a sawi a. “Budget Session neih khan Serchhip Bye-Election neih tur hi hriat sa reng a ni a, chuti chungin Minister te chet theih nan an Department chanah pawisa a dah duh lova. Salary and Wages chiah kan pass a, development na tur pawisa an dah lova CM kutah an dah vek a ni,” tiin Zodintluanga chuan Minister ten thil an tiam pawhin khawia pawisa mah an kawl loh thu a sawi bawk.

MPCC Vice President, Lalsawta chuan Serchhip Bial mipuite chu an Vote leina tura pawisa dawng lo tur leh lei theih ni lo tura chahin, thlemna sang mah se hnawl turin a chah a, “In tu leh fa te tan chenna ram tur kan din dawn mek a ni,” a ti. An party chu hna thawk tha ve taka an inngaih laiin kum 2018 inthlanpui ah paih an ni tih sawiin, hemi atang hian hmalam pan tura an danglam ngam a tul thu a sawi a. Mi tha bawm siam an tumlo tih sawiin, “A system a that chuan that loh theihlohna bawm siam a theih a, chutiang bawm chu siam kan tum a ni,” a ti a. Serchhip Bial-a an Candidate, PC. Laltlansanga chu Opposition MLA atana a duh ber thu a sawi bawk.

He hunah hian Lalrindika MLA pawhin MLA atana Ruling an that thu rorellai pawl ten an sawi fo thu sawiin, an Bial-ah erawh hun rei tak chhung Bial mi MLA neiin inthlan leh ah pawh Chief Minister ngei pawh lo ding se an tan ve viau a ngaih a rin thu a sawi a. Opposition Bial an nih avanga rep tumtu sawrkar an awm chuan sawrkar tha an ni dawnlo tih sawiin, chutiang a lo sawi an awm anih chuan ram hmelma an nih thu a sawi bawk.