Mizoram-ah COVID-19 hri kai hmuh belh zel an ni

Zirtawpni khan Mizoram-ah Sample 386 enfiah niin heng atang hian COVID-19 hri kai mi pathum hmuhchhuah an ni a, Inrinni khan Sample 547 enfiah niin hri kai pathum bawk hmuhchhuah an ni.

Zirtawpni a Mizoram-a hri kai hmuhchhuah te hi Rapid Antigen Test hmanga Sample enfiah 345 te atanga hmuhchhuah niin an vai hian Lengpui Airport Screening Point atanga hmuh te an ni a, an zinga pahnih hi Mizoram-a rawn haw tur niin midang pakhat hi State pawn atanga hna thawk tura Mizoram-a rawn lut a ni. Zirtawpni khan ZMC Laboratory-ah Sample enfiah awm lovin District hrang hranga TrueNat Laboratory-ah Sample 41 enfiah a ni thung a, hri kai hmuhchhuah erawh an awmlo thung.

Inrinni-a Mizoram-a hri kai hmuhchhuah pathum te hi Rapid Antigen Test hmanga Sample enfiah 457 te atanga hri kai hmuh niin an zinga pahnih hi State pawn atanga rawn haw, Lengpui Airport Screening Point atanga hri kai hmuh te an ni a, midang pakhat hi tunhnaia State pawn atanga rawn haw, RT-PCR Test negative result a neih avanga Sample enfiah loh niin a hnuah hri kai lanchhuahna a neih avanga sample enfiah leh atanga hri a kai tih hriatchhuah a ni. Inrinni khan ZMC Laboratory-ah Sample 76 enfiah niin TrueNat Laboratory-ah Sample 18 enfiah a ni bawk a, hri kai hmuhchhuah an awmlo a ni.

Inrinni khan Mizoram-ah COVID-19 hri kai mi pathum te chu enkawl dam niin hri kai enkawlna hmun atanga chhuahtir an ni a, nimin khan hri kai enkawl dam awm lovin nimin tlai dar 5:00 thleng khan Mizoram a COVID-19 hri kai hmuhchhuah chu 4490 an tling ta a, an zinga 4439 te chu enkawl dam ni tawhin hri kai hmuhchhuah atanga za zela 98.86 te chu enkawl dam an ni tawh a, hri kai enkawllai 40 la awmin hri kai zingah nunna chan 11 an awm tawh bawk a ni.