Serchhip bial-a bye-election neih tur pualin MPF ten Common Platform an buatsaih

April 17-a Serchhip bial Assembly bye-election neih tura Candidate te tan nimin khan Mizoram People Forum (MPF) Serchhip District chuan Common Platform an buatsaih a, he hunah hian Candidate 6 te telin mipuite hmaah thu an sawi a ni.

Serchhip Bazar tual-a MPF in Common Platform an buatsaih hi MPF Serchhip District President, Rev. Zohmunmawia chuan kaihruaiin MPF-a an Secretary, R. Sanghmingthanga chuan hetiang hun an buatsaih chhan te a sawi a. Political Party ten anmahni-a Public Meeting an buatsaih ah an party mi leh sa lo te tan tel a remchan lohna te a awm theih avang te, mipui ten Candidate te leh an thiltum leh hmachhawp neih te an hriat theihna turin hetiang hun hi buatsaih a nih thu a sawi bawk.

Nimin-a MPF Common Platform-ah hian Serchhip bial Assembly bye-election neih tura Candidate mi 6 te tel kim theiin minute 15 theuh thusawina hun pek niin thusawi dan tur pawhchawp-ah Indian National Congress (INC) Candidate, PC. Laltlansanga chuan thu sawi hmasa berin Serchhip khua-a piang leh seilian a nih thu leh, Serchhip khawtlang tana hma a lo lak tawhna leh hmalakna tura a ngaih pawimawh te a sawi a. Hemi hnu hian Independent Candidate, Ramhlun-Edena chuan Pathian thu hmanga he inthlan an chuh chhan te sawiin, Pathian ruat avanga hetianga inthlan ngai kan nih thu te a sawi bawk.

BJP Candidate, Lal Hriatrenga Chhangte chuan Serchhip khaw mi a nih thu sawiin, tun thlengin Serchhip-ah a nupui fanau te pawhin Vote neiin Serchhip khua-a haw thin an la nih thu a sawi a. BJP atanga he inthlan a chuh chhan te sawiin, hmalakna tur hrang hrang a neih te a sawi bawk. Hemi hnu hian ZPM Candidate, Lalduhoma chuan thu sawi ve lehin Serchhip bial tana hma an lakna ah MLA Fund hmang te, Department te nen thawkho-a hma lakna leh ZPM sawrkar huna hma an lakna tur an neih leh hma an lakna bakah Serchhip bial tana hmalak chhunzawmna tura an hmachhawp te a sawi.

Hemi hnu hian MPC Candidate, Vanlalruata chuan thu sawi ve lehin kan ram, kan Hnam leh kan Sakhua a him a ngai tih sawiin, DPR siam thin a nih avangin MLA atana thlantlin a nih chuan MLA nihna nen heng Project Report an siam thin te hi bawhzuia hmalak theih a inbeisei thu a sawi a. Thusawitu hnuhnung ber MNF Candidate, Vanlalzawma chuan Serchhip bial mipuite chu thawhhopui-ah sawmin Mizoram-ah sawrkar kallai a awm avangin tun dinhmun ah chuan Serchhip bial aiawh tur hian a remchang ber nia a hriat thu a sawi bawk a ni.