Tun thla ni 26 thleng atan hri leng vanga mipui inkaihhruaina siam thar a ni

Mizoram chhungah COVID-19 kai thar nasa taka an pun leh tak avangin nimin zing dar 4:00 atanga tun thla ni 26 (karleh Thawhtanni) zing dar 4:00 thleng atan mipui punkhawm leh chetvel chungchangah inkaihhruaina thar siam a ni a, AMC Area leh District khawpui-ah te chuan mahni In leh Compound te chhuahsan khap a ni.

Hemi chungchanga State Disaster Management Authority-a State Executive Committee Chairman leh Mizoram Chief Secretary ni bawk, Lalnunmawia Chuaungo in nizan hmasa-a thuchhuah a siama a tarlan danin April 20 atanga 26 zing dar 4:00 thleng hian Public Park, Picnic Spot, Movie Theatre, Gym, Community Hall, Restaurant, Shopping Complex, Mall leh intawllenna hmun zawng zawng chu khar tur niin, Zirna In leh Sakhaw biakna hmun te chu khar vek a ni anga, Board Exam, All India Level Exam te leh Recruitment Exam kallai mekte erawh chu phalsak niin Inneihna leh reception-ah mi 30 aia tam punkhawm phal a ni lova, Mitthi vuina ah mi 30 aia tam punkhawm phal ni lovin Chhiatni/thatni puipunna-ah ei leh in sem leh siam phal a ni lo. Mipui punkhawmna heng – Birthday leh Anniversary lawmna, Games & Sports, Book Release, Lungphun leh intihhlimna ang chi reng reng te chu he hun chhung hian huaihawt phal a ni lo bawk a. Mizoram chhungah zin veivah phal niin amaherawh chu mahni chhuah tanna veng VLTF/LLTF te lehkha kengin zin tur a ni a, chu lehkha-ah chuan an kal tanna (origin) leh zinna/kalna tur hmun (destination), ni leh darkar te a chuang tur a ni thung.

Aizawl khawpui leh District khawpui-ah te chuan inkhuahkhirhna hun chhung hian tumahin mahni In leh compound an chhuahsan tur a ni lo tih tarlan niin lirthei a veivah khap a ni bawk a, hei hian sawrkar in phalna a pek Duty pawimawh nei hrang hrangte chu a huam dawnlo thung a. Pawn chhuak tur reng reng chuan (face mask leh hmanraw dang hmangin) hmai an tuam ngei tur a ni a, phalna neia dawr hawnte chu tlai dar 5:00-ah khar vek tur niin vantlang hmuna kal te chu ft. 6 tala inhlata awm tur a ni. Hmunkhata mipui pungkhawm tur ven nan Bazarpui-a thlai leh thildang zawrh chu khap a ni a. Chutihrualin, mipui mimir in awlsam taka thlai leh chawhmeh an hmuh theih nan Veng hrang hrangah leh hmun tam zawk ah chawhmeh lei theihna tur LLTF/VLTF ten ruahmanna an siam ang.

Sawrkar hnathawk leh sawrkar sum atanga hlawh la te chu COVID-19 duty turin a tulna apiangah hman an ni anga, Health & Family Welfare Department, Police, Home Guards, Civil Defense, Fire & Emergency Services, Disaster Management, District Administration, Civil Aviation, Prisons, Excise & Narcotics, Municipal Services, Forest Field Works, PHE, I&PR, P&E te chu a pangngaia kalin Sawrkar Office dang, COVID-19 duty-a ruat loh te chu Secretary, Head of Department emaw Head of Office ten hna tul bik atan Office kal dan tur an ruahman anga. Office chhungah phalna la hmasa lovin pawn-lam mi kal phal a ni lo bawk ang.

India ram pawn leh India ram hmundang atanga Mizoram-a lo lut reng reng chu Mizoram an lo luhna (Point of entry)-ah Rapid Antigen Test (RAgT) hmanga en dik vek an ni anga, hetiang hian Mizoram atanga zin chhuak, lo haw leh te pawh endik vek tur an ni ang. Rapid Antigen Test negative te chu fimkhur takin mahni hriselna inchîk-in midang nena in-contact lovin ni 7 chhung Home/Institutional/Community quarantine-in an inkhunghrang ang a. Ni 7 hnuah RT-PCR/TrueNat test an nei ang a, negative result an neih chuan inkhung zui a ngai tawh lovang. Home quarantine-a awm chhungkaw member te pawh pâwn chhuak lo leh inleng te nena inchiahpiah lovin ni 7 chhung an awm tur a ni bawk a ni.