Sugamya Bharat App chungchang sawihona nei

Nimin khan Aizawl-ah District Bawrhsap, Dr. Lalhriatzuali Ralte hovin ‘Sugamya Bharat App’ chungchang sawihona neih a ni.

‘Sugamya Bharat App’ hi March 2, 2021-a Union Minister for Social Justice & Empowerment-in a tlangzarh tak niin, mipui mimir, a bikin piangphunga rualbanlo ten awlsam zawka an harsatna chi hrang hrang sawrkar hnena an thlen theihna tur a ni a, he app hi a duhte tan Playstore-ah emaw, IoS emaw atangin download theih a ni.

He sawihona hunah hian Aizawl DC, Dr. Lalhriatzuali Ralte chuan sawrkarin rualbanlote leh kum lama upate ngai pawimawhin an hamthatna tur atan nasa takin hma a la mek zel tih a sawi a, chung zingah chuan an mamawh leh harsatna tawhte pawh sawrkar beng ti thleng zung zung tura app thar, ‘Sugamya Bharat App’ tlangzarh a ni ta hi lawmawm a tih thu a sawi a. Inthlan leh sawrkar hun pawimawh ah te pawh pianphunga rualbanlo leh Tarte tan ruahmanna siam sak an ni thin a, midangte nena intlar ngai lovin, heng - Wheelchair, Ramp, Waiting Shed bakah anmahni tanpuitu turte ruat a nih thin thu a tarlang bawk. Hemi piah lamah sawrkar chuan an mamawh ang leh awlsam taka an hman theih tur app a siam an vanneih thu pawh sawiin DC chuan, a mawhphurtu Department, Social Welfare & Tribal Affairs chu Media leh Workshop/Training kaltlanga mipuite hrilh hre zau zel turin a chah bawk.