Latest News

COVID-19 hri kai 25 hmuh belh leh an ni

Niminpiah khan Mizoram-ah Sample 2481 enfiah leh niin heng atang hian COVID-19 hri kai mi 25 hmuhchhuah leh an ni a, an zinga mi 8 te chu hri kaina hriatloh te an ni.

Niminpiah khan ZMC Laboratory-ah Sample 401 enfiah niin COVID-19 hri kai mi 4 hmuh an ni a, an zinga pahnih te hi hri kai nena inkawmhnaihna nei niin midang pahnih te hi an chanchin kimchang la hriat loh an ni. Niminpiah khan District hrang hranga TrueNat Laboratory-ah Sample 49 enfiah niin hri kai hmuhchhuah an awmlo thung.

Hetihlai hian niminpiah khan Mizoram hmun hrang hrangah Rapid Antigen Test hmangin Sample 2031 enfiah niin heng atang hian COVID-19 hri kai mi 21 zet hmuhchhuah leh an ni a, Aizawl Kanan Veng-ah hri kai 7 zet hmuhchhuah niin hri kai tawh te nen inkawmhnaih atanga hri kai an ni. Heng bakah hian Aizawl khawpui Veng hrang hrangah hri kai mi 8 hmuhchhuah te chu hri an kaina hriat a ni lo thung. Niminpiah khan Serchhip District-ah hri kai mi 3 hmuh niin Kolasib District-ah hri kai mi 2 hmuh an ni bawk.

Nimin khan Mizoram-ah hri kai mi 5 te chu enkawl dam an ni ve leh a, heti hian nimin tlai dar 5:00 thlenga Mizoram-a COVID-19 hri kai hmuhchhuah chu 4747 niin heng atang hian mi 4482 te chu enkawl dam an ni tawh a, hri kai hmuhchhuah atanga za zela 94.41 te chu enkawl dam ni tawhin tunah hian hri kai enkawllai 253 an la awm a, hri kai zingah nunna chan mi 12 an awm tawh bawk a ni.

Comments

Popular News (Last 30 Days)