Latest News

Health Minister in Health Deptt. hotute a kawm

Health Minister Dr. R. Lalthangliana chuan nimin khan Health Department Officers te thutkhawm neihpuiin Mizorama COVID-19 hri lo pung thar leh thut chungchanga hmalak dan tur hrang hrang an sawiho.

He sawihona SAD Conference Hall-a neih ah hian Health Minister chuan Vawiin hian Lengpui Airport-ah Thlawhtheihna lian 4 a lo tum dawn a, passengers lo thleng an tam dawn avangin keini lam pawh kan lo inbuatsaih lawk a ni, a ti a. COVID-19 lo hluar thar leh ta chungchangah tunkar ningani hian Home Minister leh Chief Secretary telin huam zau zawka Meeting neih leh an tum thu sawiin, Vairengte chu khualzin rawn tamna a nih avangin kan uluk a ngai a, Vairengte Screening Point pawh Zirtawpni hian tlawh turin kan inbuatsaih a ni, a ti.

Health Minister chuan hma hun hriat lawk a nih loh thu sawiin, a chhe ber dawn chunga hri vei pung leh thut thei kan nih hria a, hemi dona leh venna atana mamawh chi hrang hrangte lo chhut chhuaka lo inhmakhawsuih turin leh phai lam (State dang) atanga lo hawte lakah Medical Team-te pawh uluk taka an lo inrinlawk a ngaih thu a sawi bawk.

He Meetinga tarlan a nih danin tun dinhmunah hian Mizoram-a COVID-19 Vaccine pek tawh mi 92,711 an ni a, tuna pek tura ruahman zat chu mi 2,02,188 vel an ni. Vaccine hi chawhrualin ni khatah mi 5000 vel pek thin an ni.

Comments

Popular News (Last 30 Days)