Latest News

Mizoram Governor in Central YMA hruaitute kawmin hri leng dona a hmalakna an sawiho

Mizoram Governor, PS. Sreedharan Pillai chuan nimin khan Central YMA hruaitute chu Raj Bhavan-ah kawmin Covid-19 hrileng dona kawnga YMA leh tlawmngai pawl dang te hmalakna bakah thil pawimawh dang te sawiho a. Governor hian nimin vek khan Presbyterian Kohhran hruaitute chu a kawm bawk a ni.

Nimin-a Central YMA hruaitute a kawmna hunah hian Mizoram Governor chuan Covid-19 hrileng dona kawngah YMA in theihtawpin sawrkar a thlawp tih a hriat thu leh lawmawm a tih thu a sawi a. He hrileng dona kawngah hian sawrkar hmanrua te a tawk lo tih sawiin, pawl lian leh pawl chak tak YMA leh tlawmngai pawl dangte puihna leh puih chhunzawmna sawrkar chuan a mamawh takzet a ni, a ti a. Mipui vantlang hnena Hrileng dona kawnga zawm tur leh fimkhur dan tur te zirtirna kawngah pawh YMA chu theihtawp chhuah zel tura ngenin, hriattur pawimawh leh thurawn te an hnen atangin lo dawn chhunzawm zel a beisei thu a hrilh bawk. Governor chuan mipui inzirtir nasat a la tul em em nachhan chu India rama cheng mipui zinga 50 % chauhin Hmaikawr (Mask) an vuah a; heng zinga tam zawk te chu vuah diklo an la nih zel thu a sawi a. Hmaikawr vuah, midang hlata awm tum hram hram, kut sil fai leh hrileng laka himna tur thil te zirtir kawngah theihtawp chhuah chhunzawm turin a ngen bawk.

He hunah hian Central YMA hruaitute hi an President, Vanlalruata hova telin COVID-19 hrileng rawn chhuah tirh atanga tun thlengin YMA chuan theihtawp chhuahin Hrileng do kawngah sawrkar a thlawp tlat thu an sawi a. Local/Village Level Task Force, Contact Tracing, vaccine leh a tulna apiangah theihtawpin tan an la mek tih Governor chu an hrilh. Hrileng avanga harsatna piah lamah tunah hian ram kang, tui hna kangchat avanga tui in tur harsatna pawh Mizo-ram in a tawk mek tih sawiin, Mizoram ramah Court thutlukna leh mimal thenkhat hmalakna avanga Riverine Reserved Forest (Luikama ramngaw humhalh) a awm tak loh thu leh pawi an tih thu an sawi a. Governor chuan a tul anga hmalakpui a tum thu sawiin, hmun dangah chuan luipui dung-a ramngaw te chu dan khirh takin a humhalh vek nia a hriat thu a sawi bawk.

Comments

Chhiar Hlawhte