Lunglei-ah bawlhhlawh paih tur thliar tawh dawn

Lunglei khawpui-a bawlhhlawh paih tur lakkhawm thin chu Vawiin, April 1, 2021 atang hian tawih thei leh theilo thliarhran vek a ni dawn.

Nimin khan Lunglei khawpuia Bawlhhlawh thliar hran kalpui tur chungchang sawihona hi Lunglei HPC Vice Chairman, Lawmawma Tochhawng hovin a Pisa-ah neih a ni a, he hunah hian Lunglei DUDO, Andrew Lalhruaia chuan hemi chungchang hi sawifiahin Lunglei khawpuiah hian April ni 1, 2021 atang chuan chhungtin ten bawlhhlawh tawih thei leh theilo thliar hran vek tur a ni tawh dawn a. Lunglei Khawpui chhungah hian VC 24 awmin UD&PA Department-in VC 9-ah Department Motor-in bawlhhlawh a khawn a, VC 15-in anmahni veng/YMA motor hmangin bawlhhlawh an khawnin an paih thin a ni.

UD&PA Department-in bawlhhlawh a khawn thin na veng 9 bikah hian bawlhhlawh tawih theilo te hi kartin Thawhtanni atanga Zirtawpni thlengin lirthei pali ten an khawn thin dawn a, bawlhhlawh tawih theite chu kartin Thawhlehni apiangin lirthei pali bawkin an khawn khawm dawn a ni. VC 15 dang, anmahni veng/YMA motor hmanga bawlhhlawh khawna paih thin te chuan anmahni veng mil leh an remchan dan angin veng bil atan Schedule hi an siam ve dawn a ni.