Latest News

Mi 83 hnenah Tour Guide License pek an ni

Tourism Department buatsaih Graduation Ceremony & Felicitation of Tour Guide chu nimin khan neih niin Tour Guide Training mi 103 zinga pass chhuak mi 83 hnenah Tour Guide License pek an ni.

Aizawl Vanapa Hall-a Graduation Ceremony & Felicitation of Tour Guide hi Tourism Minister, Robert Romawia Royte chuan hman-puiin COVID-19 hripui chu Tourism leh Industry Sector in a tuar nasa bik nia a lan thu a sawi a, “Khual-zin an chawl a, Hotel, Restaurant te khar a ngai a, Tourism Department hi Covid hripui dona-ah thawhhlawk Department an ni,” a ti a. Tourist Lodge te Quarantine Facility, CCC, Community Quarantine-ah sawrkar in a hman thu sawiin, Tourist Lodge a thawkte pawh heng ah hian hman tangkai an ni, a ti bawk.

Tour Guide Training-a senso hi Mizo-ram Youth Commission kaltlangin NEC atangin cheng nuai 13 hmuh a ni, Livelihood Generation For Returned Migrant Workers Due to Pandemic COVID-19 Outbreak In Mizoram hnuaiah mi 100 tana training pek tura buatsaih ni mah se diltu, Returned Migrant Workers te hi mi 100 an tlin loh avangin Open Advertisement chhuah a ni. Tour Guide Training hi thla khat chhung kalpui niin Theory Class bakah Personality Development Class, Soft Skills Training, Group Exercise leh Field Training te neih pui an ni a. A tawp-ah mi 95 ten exam pe in a zinga mi 83 te chu Mizoram a Tour Guide batch hmasa ber ni tura thlan an ni a. Mi 12 erawh chu Examination paltlang leh tura duan an ni.

Tour Guide license pek te hi eizawnna mumal tak an lo neih ve theih nan Mizoram Sawr-kar in an hlawh tur, Guide Fee a duang anga. Mizoram leh State pawn atanga khualzin lo kal te hnen atangin sum leh pai lak luhna remchang an lo hmu ve thei tawh dawn a ni.

Comments

Chhiar Hlawhte