Inthlan buaipuitu ten training tum hnihna an nei

Serchhip bial Assembly bye-election neih tur atana inthlanna buaipuitu tur, Polling Official te tana Training tum hnihna chu nimin khan neih leh a ni.

Assembly bye-election neih tur atana Polling Official te tana Training tum hnihna hi BNRGSK Hall, P&E Veng leh Marian H/S Hall, Serchhip-ah te neih a ni a, he hunah hian North Vanlaiphai SDO (Civil), Dorothy Muan-sangi leh Serchhip SDO (Sadar), C. Laltleipuii te chuan inthlan buaipuitu tur Polling Official hrang hrangte tana hriat tur pawimawh te an zirtir a, Polling Official te chu an hnathawh tura ruahman te tha taka thawk tur leh theihtawp chhuah turin an chah a ni.

Nimin-a Training hi he inthlanna a Returning Officer leh Serchhip District Bawrhsap ni bawk, Kumar Abhishek leh he inthlan-a General Observer, Lokesh Kumar te chuan an telpui bawk a ni.

Serchhip bial-a Assembly bye-election neih turah hian Polling Station 29 a awm dawn a, inthlanna buaipui tur hian Presiding Officer-ah mi 36, Asst. Presiding Officer-ah mi 36 leh Polling Officer mi 72 (First Polling Officer leh Second Polling Officer mi 36 ve ve) ruatchhuah an ni a, Polling Party tinah mi 4 zel awm tura ruahman niin heng Polling Party te atang hian inthlanna a Duty tur leh Reserved a awm turte thlanchhuah ni tawhin nimin khan an Polling Party pakhat-a awm turte thlanchhuah leh an ni bawk a, heng mite hian tun thla ni 15 khian Training hnuhnung ber nei tura ruahman niin hetah hian inthlanna a hman tur bungrua te pawh pekchhuah an ni nghal dawn a ni.