Latest News

Bye-election atana Campaign hun tawpin Candidate leh Party ten am takin hun an hmang

Tunkar Inrinni-a Serchhip bial Assembly bye-election neih tur atana Campaign theih hun chu nimin tlai dar 6:00 khan a tawp ta a, Serchhip bial Assembly bye-election neih tur atana Campaign theih hun a tawp hma hun tlemte an neih chu nimin khan Party hrang hrang leh Candidate ten am taka hmangin hun an hmang a ni.

Serchhip District Election Officer leh he inthlanna neih tura Returning Officer, Kumar Abhishek chuan 26-Serchhip (ST) Assembly Constituency-a Bye Election neih tura Campaign hun tawp chungchangah hian thuchhuah siamin The Representation of the People Act, 1951, Section 126-in a sawi angin, Serchhip Assembly Constituency Bye-Election 2021 lo awm turah inthlanna felfai leh thianghlim tak a awm theih nan Vote thlak hun khar (close of poll) a nih atanga chhiarlet a darkar 48 (April ni 15, 2021 Ningani tlai dar 6:00) hnu lamah campaign phal a ni tawh lo tih a tarlang a. Hemi hnulam hi chuan Campaign phal ni tawh lovin Serchhip Assembly Constituency huamchhunga campaign tura lut, Serchhip Assembly Constituency-a vote nei si lo te pawh April ni 15, 2021 (Ningani) tlai dar 6:00 hnulamah chuan chamzui phal ni tawh lovin Serchhip Assembly Constituency an chhuahsan ngei ngei tawh tur a ni a, hei hian Candidate leh Election Agent-te a huam lovang tih a tarlang bawk. Hei bakah hian Serchhip Constituency chhung ni lo Serchhip District huamchhung ni si ah pawh Campaign kaihhnawih chi reng reng kalpui theih a ni tawh lo tih a tarlang a ni. He thupek bawhchhia an awm chuan pawisa chawitir emaw kum 2 (hnih) thleng Lung In tan emaw, a pahnih pawn hremna pek theih a ni ang.

District Magistrate chuan April 15, 2021 tlai dar 6:00 atanga April 17, 2021 tlai dar 6:00 chhungin Serchhip Bial huamchhungah mi panga (5) aia tam punkhawm khap tlat a nih thu te, Vantlang Inkhawm khap a nih thu te leh Aurinna (Loudspeaker) hmanga au khap a nih thu te a tarlang a, Election Commission of India-in a sawi angin District Magistrate thupek hian In leh In tlawh tawn (House to House) erawh a khap lo thung.

Nimin a Campaign hun a tawp hma khan PC Party chuan Campaign kharna hun Serchhip Press Club-ah an hmang a, he hun hi an Party Vice President, Lalrinzuala Chawngthu chuan kaihruaiin an Candidate, Vanlalruata chuan an Campaign dan tlangpui te a sawi a, an Party President, Lalhmangaiha Sailo chuan Campaign kharna hun hi hmangin harsatna nei lova Party hrang hrang ten tluang taka Campaign an nei thei chu lawmawm a tih thu a sawi bawk.

MNF Thalai, MNYF chuan nimin khan Serchhip Bazar leh College Peng-ah ‘Nipui Feh-chhuah’ Street Campaign neiin hun an hmang a, an Party Candidate, Vanlalzawma bakah MNYF President, Er. Lalrinawma leh AMC-a MNF Councillor thenkhat ten thu an sawi bawk a ni.

BJP Party chuan Campaign kharna hun hi nimin khan Thenzawl-a BJP Campaign Office-ah an nei a, he hun hi BJP Serchhip District President, Rothangpuia chuan kaihruaiin BJP Mizoram State President, Vanlalhmuaka chuan a hmanpui a, Vawiin tlai dar 6:00-a he inthlan neih tur atana Campaign hun tawp tur chu an party chuan tha taka zawmin an Campaigner, he Bial chhung mi ni lo te chuan he Bial hi an chhuahsan vek dawn tih a sawi bawk.

ZPM Party chuan nimin tlai khan Serchhip khawpui chhung Veng hrang hrangah Street Campaign an nei a, he hunah hian an party hruaitu thenkhat ten thu an sawi a, nimin tlai vek khn ZPM Thalai Hqrs. hruaitute chuan Serchhip Press Club-ah thuthar theh-darhtute an kawm bawk.

Indian National Congress (INC) chuan Campaign tawp ni hian Vantlang Inkhawm buatsaih lovin Serchhip Bial chhung Veng hrang hrangah Campaign an nei thung a, an Candidate, PC. Laltlansanga bakah an Party hruaitute kalin hun an hmang a ni.

Comments

Popular News (Last 30 Days)