Hri leng mekah SOP thar siam leh a ni dawn

Nimin khan Health Minister, Dr. R. Lalthangliana hovin COVID-19 Second Wave lo thawk mek chungchang sawihona neih a ni.

Health Minister Pisa-a sawihona hunah hian Minister chuan nikum kum tawp lam leh kumin kumtir lamah kan dinhmun a ziaawm chhoh em avangin inkhuahkhirhna pawh thlahdul hret hret a ni tih sawiin, “Mipuite pawh kan ngaih a thain kan inthlahdul mek nia a lan lai hian India ramah COVID-19 hrik (variant) thar lo thawk lehin mithiamte pawh an mangang hle,” a ti a, he thutkhawm a tel te chu hri laka kan him theihna tura tan lak thar pui ah a sawm bawk.

He thutkhawm ah hian mipuite himna atana pawimawh nia an hriat thil chi hrang hrang sawiho a ni a, Zan curfew chungchangte, inkhawm chungchangte leh infiamna hmun hawn chungchangte pawh sawilan niin, Myanmar atanga raltlante lo endik a tulzia pawh sawi a ni a, Mizoram luhka (entry point) hrang hrangah pawh uluk leh fimkhur lehzuala tan lak a ngai nia a lan thu sawilan a ni. Heng bakah hian Task Force ten an ngaimawh leh harsatna an tawh chi hrang hrangte pawh sawihoin SOP thar pawh siam thuai a nih tur thu tarlan a ni bawk.