Serchhip District-ah COVID-19 hri kai hmuh belh zel

Zirtawpni khan Serchhip District-ah COVID-19 hri kai mi 3 hmuh niin Inrinni khan hri pakhat hmuhchhuah a ni bawk.

Zirtawpni-a hri kai hmuhchhuah pakhat hi hmeichhia kum 57 mi niin April 15 khan Aizawl atangin Lungkawlh-ah a haw a, a hnuah a taksa-ah hri kai lan-chhuahna a neih tak avangin a Sample enfiah niin hri a kai tih hmuh a ni ta a ni. Zirtawpni khan Sainik School, Chhingchhip-a zirlai naupang pahnih te chuan hri an kai tih hmuhchhuah a ni bawk a, hri kai hmuhchhuah te hi School Hostel Room pakhat-a khawsa niin pakhat zawk hi April 8 khan Haryana atanga PCR-Test negative result nena lo haw a ni a, amaherawh chu a taksa-ah hri kai lanchhuahna a neih avangin a Sample enfiah niin hri a kai tih hmuhchhuah a ni a, a Roomate hi enfiah zui niin hri a kai ve bawk a ni.

Inrinni khan Serchhip District-a TrueNat Laboratory-ah Sample 15 enfiah leh niin hri kai pakhat hmuh leh a ni a, kar kalta a hri kai hmuh tawh in a kawmhnaih te Sample enfiah atanga hri kai tih hmuhchhuah a ni. Inrinni khan Serchhip District-ah Rapid Antigen Test hmangin Sample 57 enfiah niin hri kai hmuhchhuah an awmlo thung.

Nimin khan Serchhip-a COVID-19 hri kai mi pakhat chu enkawl dam a ni a, heti hian nimin thleng khan Serchhip District-a COVID-19 hri kai hmuhchhuah chu mi 191 an tling tawh a, hri kai hmuhchhuah zinga mi 180 te chu enkawl dam ni tawhin enkawllai 10 an awm leh tawh a, hri kai hmuhchhuah zingah nunna chan mi pakhat a awm tawh bawk a ni.