Bye-election atan inbuatsaihna peihfel niin tukin dar 7:00 atangin Vote thlak a ni dawn

Serchhip Bial Assembly bye-election neih tur atan inbuatsaihna peihfel a ni tawh a, he inthlanna a Vote thlak buaipuitu tur, Polling Party te pawhin an duty-na tur hmun nimin tlai dar 4:30 khan thleng felin, Serchhip Bialtu MLA thlang tur hian Serchhip Bial chhunga Vote nei te chuan tukin dar 7:00 atangin Vote an thlak tan dawn a ni.

Serchhip Bial Assembly bye-election neih tur atan hian nimin chawhma lam khan Polling Party te hi an kalna tur Polling Station chu khawl hmanga tihfel sak an ni a, hemi hnu hian Polling Party te hnenah hian inthlanna atana hman tur bungraw pawimawh leh Vote thlakna khawl te chu pekchhuah chhunzawm nghal a ni a, Polling Party te hian an bungrua te an enfiah zawh hnuah an Duty-na tur hi pan nghalin Polling Party chhuak hmasa ber, Neihloh Polling Station-a duty turte chuan nimin chawhnu dar 1:00 khan Serchhip DC Office an chhuahsan a ni.

Serchhip Bial Assembly bye-election neih tur buaipui tur hian Polling Party 36 ruahman niin nimin khan Polling Station 29-a duty turte an chhuak a, a bak zawng te hi a tul huna chechhuak thei turin an awm thung a, Polling Party pakhat-ah hian Presiding Officer leh Asst. Presiding Officer pakhat ve ve bakah Polling Officer pahnih zel an awm a, venhimna lam hna thawk turin Police pahnih zel dah an ni bawk.

Election Commission of India in ruahmanna a lo siam tawh angin Serchhip Bial bye-election neih turah hian tukin dar 7:00 atang hian Vote nei te chuan Vote an thlak dawn a, Serchhip Bial chungah hian khaw pali (4) awmin Polling Station 29 a awm a, heng te hi Urban Area-ah Serchhip-ah Polling Station 17 leh Thenzawl-ah 10 bakah Rural Area-ah Buangpui leh Neihloh-ah pakhat ve ve a ni a, Vote nei thei Mipa 9191 leh Hmeichhia 10,329; an vaiin Vote nei 19,520 an awm a, heng bakah hian Service Voters 198 awmin an zinga pahnih te chu Hmeichhia an ni a, hemi hmalam hian kum 80 chunglam leh pianphunga rualbanlo, PwD te chuan Postal Ballot hmangin Vote an lo thlak tawh a ni.

Serchhip Bial Assembly bye-election neih turah hian Vote thlakna atan Electronic Voting Machine (EVM) chu hman a ni dawn a, hei bakah hian Polling Station tinah VVPAT hman tur niin hetah hian Vote thlaktute chuan an Vote chu an hmu nghal thei dawn a ni. Hei bakah hian Polling Station 29 zinga Polling Station 15-ah chuan Web Casting kalpui a ni dawn a, heng Polling Station-ah te hian inthlanna buaipui dan te chu Internet atanga lo enfiah reng theih a ni dawn a ni.

Serchhip Bial chhunga Vote nei zawng zawng te hnenah hian 'Voter Information Slip' chu semchhuah a ni tawh a, hei hi Vote thlak turte chuan Polling Station-ah an keng anga, hei bakah hian Electoral Photo Identity Card (EPIC) an keng ngei tur a ni a, engemaw harsatna avanga EPIC keng theilo chuan Aadhaar Card, MG-NREGS Job Card, Passbook, Driving License, PAN Card leh thildang, Dan in a phal te an keng thei dawn bawk a ni.

Tun tuma Serchhip Bial Assembly bye-election neih turah hian Candidate 6 an awm a, heng te hi Bharatiya Janata Party (BJP) Candidate Lalhriatrenga Chhangte, Indian National Congress (INC) Candidate PC. Laltlansanga, Mizoram People's Conference (MPC) Candidate Vanlalruata, Mizo National Front (MNF) Candidate Vanlalzawma, Zoram People's Movement (ZPM) Candidate Lalduhoma leh Independent Candidate Ramhlun-Edena te an ni.

Election Commission of India in Vote thlak hun tura a lo ruahman tawh, zing dar 7:00 atanga tlai dar 6:00 thleng tih tawh chu ECI hian rawn pawtsei lehin tlai lamah zan dar 7:00 thleng Vote hi thlak theih a ni ang. Vote thlak zawhfel a nih hnu hian Vote thlakna atana hman bungrua te hi Serchhip DC Office-ah lakhawmin EVM te hi Strong Room-ah dahluh nghal a ni dawn a ni.