October - March chhungin MRP in ruihhlo man tam

Nikum October ni 1 atanga kumin March 31 thleng khan Mizoram Police te chuan ruihhlo cheng vbc. 22 chuang hu manin Mizoram Police leh Assam Rifles Joint Operation chuan cheng vbc. 6 chuang hu an man bawk.

Mizoram Police thuchhuah siamin a tarlan danin nikum October ni 1 atanga kumin March 31 thleng khan Mizoram Police te hian Heroin Kg. 2.176 zet manin heng Heroin an man hlut zawng hi Rs. 78,33,600/- hu a ni a, hemi chhung hian Methamphetamine Kg. 72.027 zet man bawkin hei hi Rs. 21,60,81,000/- hu a ni a, Ganja Kg. 57.343 manin Rs. 2,86,715/- hu a ni. Alprozolam pawh mum 110 manin Rs. 1,100/- hu a nih bakah Ganja par Kg. 1.650 hu manin hei hi Rs. 22,000/- hu a ni bawk. Heng an thil man hrang hrangah hian thubuai 44 ziahluh niin mi 62 man an awm a, mi man zinga a tam ber mi 37 te chu Heroin kaihhnawih a man niin Methamphetamine kaihhnawih ah mi 11 leh Ganja kaihhnawih ah mi 8 man an awm bawk a, midang 6 te hi thildang kaihhnawih a man an ni thung.

Hemi hun chhung vek hian Mizoram Police te hian Assam Rifles nen Joint Operation neiin Methamphetamine Kg. 23.6 zet an man bawk a, hei hi Rs. 6,04,75,000/- hu niin hemi kaihhnawih ah hian thubuai pakhat ziahluh niin mi pakhat man a awm bawk a ni.