Zoram Thar in inthlan chuh loh chhan sawifiah

Zoram Thar Zofate Lairelna hruaitute chuan Ningani khan Serchhip Press Club-ah thuthar thehdarhtute kawmin Serchhip bial-a Assembly bye-election neih tur chu chuh ve duh hle mah se Pathian an rawn hnuah an chuh ta lo tih an sawi.

    Serchhip Press Club-a thuthar thehdarhtute an kawmna hunah hian Zoram Thar Zofate Lairelna hruaitu, Rev. Dr. Zaichhawna Hlawndo chuan thuthar thehdarhtute zawhna chhangin Serchhip bial MLA bye-election neih tur chu 2018 inthlanpui-a a lo din tawhna a nih avangin amah pawhin din leh ngei a chak thu a sawi a, amaherawh chu Zoram Thar Zofate Lairelna Inpui chuan ngun taka Pathian rawnin, a chhanna chiang taka an dawn tlan chu he bye-election a din loh hi a ni, a ti. Rev. Dr. Zaichhawna chuan Zoram Thar Zofate Lairelna te chuan kan ram-a Party Sawrkar nilo, Pathian Lal ram sawrkar lo ding tur atan Chhiahhlawh hna an thawk zel dawn tih sawiin, kum 2018-ah inthlan an chuh chu a bul tanna a nih thu leh Krista Lalram chu ding tawhin, a ding zel dawn a, a thang zel dawn tih a sawi a. Zoram Thar chu NGO-in sawrkar-ah an inziaklut tawh tih a sawi bawk.