Latest News

Ni khat-ah hri kai 90 zet hmuh belh leh an ni

Niminpiah khan Mizoram-ah Sample 2605 enfiah leh niin COVID-19 hri kai mi 90 hmuh leh an ni a, Mizoram-a hri kai enkawllai chu mi 500 aiin an tam leh tawh.

Niminpiah khan ZMC Laboratory-ah Sample 541 enfiah niin heng atang hian COVID-19 hri kai mi 30 zet hmuhchhuah an ni a, an zinga 9 te chu Central Reserve Police Force (CRPF) mi leh sa niin mi 18 te chu hri kai hmuchhuah tawh nen inkawmhnaihna nei an ni a, midang pahnih hi State pawn atanga rawn haw inkhunghrang lai niin midang pakhat hi State pawn-a zin dawn avanga Sample enfiah, hri kai tih hmuhchhuah tak a ni a. District hrang hranga TrueNat Laboratory-ah Sample 36 enfiah niin hri kai hmuhchhuah an awmlo a ni.

Niminpiah khan Mizoram-ah Rapid Antigen Test hmangin Sample 2028 enfiah niin COVID-19 hri kai mi 60 zet hmuh an ni a, Lengpui Airport Screening Point-ah Mizoram-a rawn lut tur enfiah atangin hri kai mi 15 hmuhchhuah niin Aizawl khawpui chhung Veng hrang hrangah hri kai mi 24 zet hmuhchhuah an ni a, Lawngtlai District-ah hri kai mi 16 zet hmuh niin Serchhip District-ah hri kai pakhat hmuh a ni a, Mamit leh Kolasib District-ah hri kai mi pahnih ve ve hmuh an ni bawk.

Nimin khan Mizoram-a hri kai mi 7 te chu hri lakah fihlimin enkawl dam an ni leh a, heti hian nimin tlai dar 5:00 thleng khan Mizoram-a hri kai hmuhchhuah chu 5085 an tling tawh a, hri kai zinga 4576 te chu enkawl dam ni tawhin hei hi hri kai hmuhchhuah atangin zaa 90 niin hri kai enkawllai 497 an la awm mek a, hri kai zingah nunna chan mi 12 an awm tawh bawk a ni.

Comments

Chhiar Hlawhte