Polling Party te inpeihfel

Serchhip Bial bye-election neih tur atana inthlanna buaipuitu turte tana training hnuhnung ber chu nimin khan neih niin Vawiin-ah Polling Party te hian an duty-na tur an pan ang.

26-Serchhip (ST) AC bye-election neih tur atana Polling Party te tana training hnuhnung ber hi BNRGSK Hall leh Marian H/S Hall-ah te neih niin SDO (Sadar), C. Laltleipuii leh North Vanlaiphai SDO (Civil), Dorothy Muansangi ten zirtirna an pe a, tun tum Training hi a vawithumna leh Training hnuhnung ber tur niin he hunah hian inthlanna atana hman tur EVM hrang hrang enkawl dan te zirtir an ni a, chawhnu lamah heng an thil zir te hi a taka tihchhinna neih zui a ni bawk.

Hetianga Polling Party te tana Training hnuhnung ber neih a nih rual hian nimin chawhnu lam khan EVM Randomization chu neih leh a ni a, he hunah hian inthlanna a hman tura lo thlan tawh EVM te chu a hmanna tur Polling Station thliarfel niin hemi hmalam hian hman mai theih turin EVM te hi peihfel a lo ni tawh a ni.

Ruahman lawk ang chuan Serchhip Bial Assembly bye-election neih tura duty turte hi Vawiin hian chawhma lamah Randomisation neiin an kalna tur Polling Station tifelin inthlanna a hman tur lehkha pawimawh leh Vote thlakna khawl te chu pekchhuah nghal an ni anga, hemi hnu hian Polling Party te hian an duty-na tur an pan zui nghal dawn a, Polling Party chhuak hmasa ber turte hian chhun dar 12:00-ah Serchhip DC Office an chhuahsan dawn a ni.