Serchhip District chhungah African Swine Fever vanga Vawk thi an awm tih finfiah a ni

Tunhnaia Serchhip District chhung Keitum khua a Vawk thi te Sample enfiah atangin Vawk hri hlauhawm, African Swine Fever (ASF) kai hmuhchhuah an awm.

Serchhip District AH & Vety Officer, Dr. R. Lalmakthanga chuan tunhnai ah Keitum khua ah hian Vawk 11 a thi tawh tih sawiin, heng Vawk thi te atangin Vawk 5 chu an Sample la-a enfiah tura Aizawl-a thawn a nih thu a sawi a, heng zinga pathum te chu Bhopal-a thawn leh a ni tih sawiin, heng an Sample thawn leh te hian hri an kai vek tih thu an dawn thu a sawi bawk.

Hetianga Keitum khua a ASF vanga Vawk engemaw zat a thih avang hian Serchhip District Chief Veterinary Officer, Dr. Thangzadinga chuan thuchhuah siamin he hri hi a darh zel loh nan ‘The Prevention & Control of Infectious and Contagius Disease in Animal Act, 2009’ Section 20 Sub-Section 1 in thuneihna a pek angin Keitum khua hi April 16, 2021 atang khan thu leh awm hma chu Vawk hri lenna hmun, ‘Infected Area’ a ni tih a puang a. Hemi ang hian Keitum khua atanga Vawk lakchhuah emaw, lakluh emaw khap tlat niin Vawk thi reng reng paih mai lovin Chinai nen thuk taka phum ngei tur a ni a. Vawk talh leh Vawksa zawrh pawh khap tlat a ni bawk.

Serchhip DVO, Dr. R. Lalmakthanga chuan Keitum khua ah hian Vawk 11 lai thi tawh mah se Mizoram khaw thenkhat-a tunhnaia Vawk thih dan nen chuan a inanglo deuh tih a sawi a. Khaw thenkhat ah Vawk damlo te hun reilote chhunga an thih nghal zung zung laiin Keitum khua a Vawk damlo thenkhat te erawh chu an la harh tha viau thung tih a sawi bawk.

Hetianga Keitum khua ‘Infected Area’ a puan a nih tak avang hian sawrkar pawhin a tul anga hma la nghalin Inrinni khan Keitum ah hian Task Group pawh din nghal a ni a, hei hian chak takin hri darh zel tur venna kawngah pawh hma an la zui dawn a ni.

Hetihlai hian African Swine Fever avang hian Mizoram hmun hrang hrangah harsatna a thleng chho mek a, hriat theih chinah tunhnaia Mizoram-a Vawk thi hi 855 zet a tling tawh a. Siaha-ah chuan Inrinni khan African Swine Fever (ASF) vei vawk puitling pali (4) te chu kahhlum niin AH& Vety Department Farm ram chhungah ft. 10-a thukin lei lai khuarin Chinai nen an phum bo nghal a ni.