Latest News

Serchhip-ah Police ten Zu thahnem tak an man

Tuikhurhlu atanga Hnahthial-a lak tur nia sawi Rakzu litre 560 zet chu Inrinni zing khan Serchhip Police ten manin hemi kaihhnawih ah hian mi pahnih leh a phurhna motor pawh man nghal a ni.

Serchhip Police te hian Serchhip Bial bye-election neih tur atan tunlai hian Police te chuan ngawrh takin duty an kalpui mek a, Inrinni zing khan Aizawl lam atanga rawn chho nia insawi Maxi Cab pakhat, Mz-01F-6001 chu lo enfiah in he motor a phurh Zu te hi man a ni ta a ni. Heng zu te hi Buara 14-a dah niin Buara pakhat ah hian litre 10 zela ngaih fun 4 zel a awm a, a vai hian litre 560 niin fun khat hi Rs. 3000/- man vel nia ngaih a ni a, hetianga chhut hian a vaiin Rs. 1,68,000/- hu nia chhut a ni.

Heng Zu te hi Zuangtui-a cheng nia insawi Lalfamkima (45) leh a nau, Lalmuankima (43) ten an rawn phurh niin Motor pawh hi an ta niin an sawi a, Tuikhurhlu-a mi pakhat in Hnahthial-a dah tura a tih nia sawiin, an va pek tur hian alo chang dawn niin an sawi a, tun tum hi an vawikhat tihna a nih thu an sawi bawk.

Heng Zu leh a kaihhnawih a man bakah lirthei te hi Inrinni vek khan Serchhip District Court-ah hruai nghal an ni.

Comments

Chhiar Hlawhte