Latest News

Bye-election-a hman tur EVM peihfel niin Postal Ballot buaipui tur ten Training an nei

Serchhip bial-a Assembly bye-election neih tur atana inbuatsaihna chu ngawrh taka kalpui mek zel niin Vote thlakna khawl, Electonic Voting Machine (EVM) hman turte pawh nimin khan tihfel a ni a. Postal Ballot-a Vote thlak turte tan nimin vek khan Training pawh neih nghal a ni bawk.

Serchhip Bial Assembly bye-election neih tur atana hman tur leh Training a hman tur Vote thlakna khawl, Electronic Voting Machine (EVM) leh Voter-Verifiable Paper Audit Trail (VVPAT) te thliar fel a nih hnuah nimin khan heng EVM te hi hman theih tura peihfel a ni ta a, hemi atan hian nimin khan Serchhip DC Conference Hall-ah EVM Second Randomization neiin EVM siamtu Company, Electronics Corporation of India Limited (ECIL) lam mithiam te pawhin an rawn hmanpui a, EVM hman tura thlan fel tawh te chu a hmanna tur Polling Station thlir fel niin Serchhip Bial chhung Polling Station tina hman tur  EVM te tihfel a nih hnu hian heng EVM te hi Commission nghal niin Candidate te hming leh an Chhinchhiahna te dahluh nghal a ni a, tihtur ang ang te tihfel nghal niin hemi hnu hian EVM te hi khung tha lehin Strong Room-ah dahluh a ni a, Central Armed Police Force (CAPF) ten chhun zan zawmin an veng nghal dawn a, inthlan dawn-a Polling Party te an chhuah dawnah chauh pekchhuah tawh tur a ni ang.

Serchhip Bial Assembly bye-election a Candidate list pawh 'Form 7A' hmangin tarchhuah a ni tawh a, BJP Candidate Lalhriatrenga Chhangte chu a chung berah a awm anga, Indian National Congresss (INC) Candidate, PC. Laltlansanga, Mizoram People's Conference (MPC) Candidate, Vanlalruata leh Mizo National Front (MNF) Candidate Vanlalzawma ten dawtin, Zoram People's Movement (ZPM) Candidate, Lalduhoma chu pangana ah a awm a, a hnuai berah Independent Candidate, Ramhlun-Edena chu hming indawt hnuai berah a awm thung a ni.

Hetihlai hian he inthlan neih tura Postal Ballot buaipuitu tur Official te tan nimin khan Serchhip DC Meeting Hall-ah training neih a ni a, he hun hi Serchhip SDO (Sadar), C. Laltleipuii chuan telpuiin an hnathawh dan tur hrang hrang a zirtir a.  Tun tuma bye-election ah hian Service Voters te bakah kum upa leh Person with Disabilities (PwD) bakah hri leng avanga enkawl leh khunghran te chuan Postal Ballot hmangin Vote an thlak thei dawn a. Hei vang hian Postal Ballot buaipuitu pawh ruat tam niin mi 32 lai ruatchhuah an ni a, tunkar tawplam atang hian heng mite hian an hna thawk tanin Postal Ballot hmanga Vote thlak turte hi an In-ah an kalchilh dawn a ni.

Comments

Chhiar Hlawhte